Notification

×

Iklan

Iklan

Gadele Inggih

19 Januari 2019 | 23.08 WIB Last Updated 2019-01-19T16:08:25Z
Ditulis oleh : A.S Patimarajo


Adapun kalabihan Mak Inggih maso dulu zaman bagolak, hanyo galeme jo gadele. Istilahnyo samo jo kolak. Sado urang maso itu kanai dikolak dek Mak Inggih. Bapokok gadele itu pulo, Mak Inggih bisa jadi kapalo dusun taruih kapalo kampuang hinggo kapalo nagari.

Sakali wakatu, Mak Inggih bajawek kato jo Datuak Kayo. Kecek Datuak Kayo maso katibo, kalau dapek jadi kapalo kampuang, yo agak barayia asam handaknyo. Sabab kok tipih juwo uncang saku kapalo kampuang tu, payah molah inyo. Tamu banyak. Kepeang kalua tiok malangkah. Kutiko kamancalon sabalunnyo baabih abih  pulo.

Baleh Mak Inggih,  upah  kapalo kampuang tu, ndak paralu digadangan. Sabab jadi kapalo kampuang tu ndak baabih abih bagai doh. "Dulu ambo ndak bapokok doh. Bisa juwo jadi kapalo kampuang. Jadi bara sajo upah diagiah yo tarimo sajolah. Iklas sajolah mauruih nagari ko," kecek Inggih takah yo bana, disambuik tapuak tangan dayang dayangnyo. 

Kato kato Mak Inggih nan mangecek ndak bapokok, samaso jadi kapalo kampuang tu, didawa dek anak kamanakan Datuak Kayo. "Dulu, nan mabayia an kaparaluan Mak Inggih tu, Mak Asin adiak Datuak Kayo," kecek urang tu. " Yo, ndak jo kepeang Inggih nan payi doh," sambuangnyo.

Mako bakambanglah carito di lapau simpang, baso Inggih ko tukang gadele. "Kalau kepeang inyo ndak kalua,  uncang  urang nan kariang dibueknyo. Sinan galianyo Mak Inggih," kato pareman simpang.

Kecek pareman tu pulo,  jikok bajanji Mak Inggih ijan tarok  yobana mamikianyo. Lengah lengah cangok sajolah. Kok layi baliau tapati, sukur. Tapi kok lupo liau, antok sajo. Sabab jikok ditagiah bana ka inyo, sagelek sajo dek baliau untuak mailak. Lidahnyo ndak batulang.

Ado dulu inyo mangecek kamambuek garobak esteem. "Tingga rodanyo sajo lai. Kini lah banyak nan mamasan," kecek Mak Inggih ka urang rami. Nan mandanga tacangang. Mamuji Inggih satenggih langik, urang nan sagalo santiang. Pandai mambuek kurisi, bisa pulo mambuek garobak.

Ruponyo, lah limo musim balalu. Lah sapuluah kali pulang padi. Nan garobak esteem itu tak juwo nampak puncak atoknyo. Kutiko ditanyo ka Mak Inggih, dijaweknyo jo galak manih. " Ijan itu lo nan kalian tanyo ka waden lai. Tanyolah ka urang bengke. Waden kini jadi wali nagari komah," jawek Mak Inggih sambia galak mamiciang.

Banyak nan lain gadele  Inggih dinanti urang kampuang. Sabanyak itu pulo nan maleset. Tapi nan mambuek heran, banyak  juwo nan suko jo Mak Inggih. Antah bara kali kanai alua, tapi nan mandukuang banyak juwo. "Apo sabananyo nan tajadi di nagari kini ko," tanyo cadiak pandai di lapau simpang.

Mako bamacam pulo, hasia tarawang urang cadiak pandai. Ado nan mangecek, nan mandukuang Mak Inggih tu tatariak mancaliak gaya Mak Inggih nan takah urang biaso. Biya jadi urang pucuak bana inyo,  tatap sajo ramah jo rakyat badarai. Itu diulang ulang siaran radio tiok pagi.

Sabaliak pado itu, hasia tarawang pihak sabalah lain pulo. Katonyo, asa namuah bakompolot jo pandukuang  Inggih, pasti kanyang. Sabab, sagalo caro dimainan dek urang dakek Inggih. Saganok kaparaluan hiduik ditangguang. Nan paralu layi amuah mangamek sajo lapeh salero. Lah banyak nan amuah takah itu.

Kutiko carito ko diulang baliak dek Mak Uniang ka Malanca sudah sumbayang subuah pagi tadi, malanca mamanciang, "Lamak lo sato ka Mak Inggih tu yo, Mak. Mangamek sajo lapeh salero!"

"Yo, Nca. Pintu tobat kan tabukak taruih," jawek Mak Uniang.

Malanca ta haniang...
×
Kaba Nan Baru Update