Ditulis Oleh : A.S Patimarajo
Oto balak eseh jatuah ka banda sudah malantak tembok jambatan, patang Ahad, bulan carai, tahun 70-an. Surang dari panumpangnyo, Pak Jabar, guru nan suko mamilin pusek murik. Kapalo Pak Guru ko, kabanyo, luko. Sanayan pagi, inyo ndak bisa maaja.
Hari nan sahari tu, raso hari rayo dek Mak Uniang jo kawan kawan. Sabab guru nan basuaro barek tu ndak tibo. Anak kelas anam maraso nyaman. Baitu juwo kelas ampek nan diaja dek Pak Guru nan gapuak, gadang badan, basunguk taba.
Kalau jo guru nan sorangko, ndak bisa basilengah. Apo lai batea tea. Saketek sajo laku parangai awak sumbang dalam kelas, tunggu sajo paapuh papan tulih tibo di muncuang. Kok indak ba itu, kapua malingka sampai ka kuduak. Itu lah nan ringan hukumannyo tu. Nan barek pusek kanai pilin. Bisa juwo jantiak kareh di talingo. Samo jo tampeleang tibo di kaniang.
Lah biaso tiok hari. Kutiko guru ko masuak, anak didiknyo lah duduak bataratik. Suaro ndak ado nan tadanga. Takzim bana. Ba itu juwo takalo inyo manarangan matematik, indak ado nan malengah. Sahinggo, samada mada utak kawan, akianyo mangarati juwo. Karano paratian ndak bacabang manyimak guru.
Kasado wali murik tahu, baso Jabar ko guru pamberang. Murik nan mada, karengkang, pasti lah kanai pilin, kanai cekuih, kanai jantiak, kanai lampang, sarato kanai sipak bagai. Tapi sagalo pangaduan, dijawab urang tuo di rumah, jo kato nan lah disapakati: "Untuang lai ado juwo Pak Jabar. Kok indak, lah mada mada, tangka tangka kalian sadonyo mah," puji wali murik untuak Pak Jabar.
Ndak ado urang kampuang, nan manyarang Pak Jabar ka sikola. Apo lo nan ka mangadukan baliau maniayo. Jaleh jauah panggang dari api. Pak Jabar sangek dihormati wali murik. Urang kampuang Mak Uniang sagan ka baliau.
Malah urang gaek anak anak nan tangka maso itu, batarimokasih ka Pak Jabar, nan indak pandang bulu takalo maagiah hukuman ka muriknyo.
Ado anak datuak suku, urang nan punyo tanah tampek sikola tu tagak, tatap sajo kanai lampang karano ndak bisa diaja barih babarih manuju tanah lapang. Ado pulo anak bakeh wali nagari, tatap juwo kanai cekuih dek ndak manuruik aturan jalan tagap.
Ado pulo surang kawan nan rajin bana manoloang Pak Jabar manundo sepeda di jalan mandaki. Tibo di kelas, tatap juwo kanai kaki, tasabab mada.
Sakali pagi, wukatu baraja lah tibo. Pak Jabar alun juwo datang. Mako raso tibo hari rayo ka duo pagi tu. Anak murik nan kabaraja jo Pak Jabar, lah mulai gadang hati. Lokal lah mulai centang parenang. Ado nan tagak ateh bangku. Ado nan duduak ateh meja. Ado balari bagai disalo salo kurisi mangaja bola.
Kutiko kawan nan di halaman, mancaliak surang kawan lain manundo sepeda dari jauah, sado kalakuan langsuang barubah. Sabalun Pak Jabar tibo, sa isi lokal capek maatur posisi. Meja barasiah. Bangku tasusun. Sadonyo duduak takzim.
Takalo Pak Jabar masuak, ndak ado nan barubah dalam kelas. Palajaran balanjut takah hari biaso. Dimulai jo do'a. Sudah tu saketek nasehat dari baliau. "Jikok kalian lai bataratik, mako kalian lai manakah jadi urang." Itulah kato mutiara dari baliau.
Mak Uniang mancuritoan kaba ko ka Malanca sudah sumbayang subuah, di Musajik Tawakal, pagi tadi.
Sabalunnyo Malanca mangabaan, di maso kini, banyak guru nan dikadukan urang tuwo murik ka pihak barwajib, tasabab anaknyo kanai piciak di sikola.
"Satahun kami sobok jo Pak Jabar dalam kelas, tabaok sopan santun sampai gaek," bisiak Mak Uniang samo surang.
Malanca tananang....
