Ditulis Oleh : A.S Patimarajo
Pasbana.com -- Donal Dorom rajo nagari Mak Sam, lah maneken karateh segel, baso ibu kota nagari Israel pindah ka Yerusalem tampek latak Baitul Mukadis kiblat paratamu madok sumbayang. Saisi alam tasentak. Anak anak surau jago, manantang parangai Dorom nan maagiah jalan Yahudi manguasoi kota basajarah tu.
Bakambang curito di lapau simpang, sabananyo si Dorom ko bautang budi ka Yahudi. Sainggo apo nan disuruah Yahudi, musti dilakuannyo. Jikok indak amuah, beko coki dibukak. Bateba aib saisi alam. Kama muko ka disuruak an.
Ciek lai, kabanyo si Dorom maaliah an isu. Lah acok Korea Utara mintak parang nuklir jo inyo. Tapi si Dorom ndak talok malawan. Jo Korut ijan main main. Paluru kandalinyo bisa malayang ka kampuang si Dorom. Bakabuik kabuik buliah rumah putiah si Dorom dibueknyo.
Mako dicarilah caro mambuek urang madok ka nan lain. Dikakok karaj baru. Baiyo iyo jo konco. Ditekan surek pangakuan Yerusalem jadi ibu kota nagari Yahudi, nan suko mambuek cabuah. Lupo urang jo garatek Kim Jong Un.
Tapi, kecek Mak Uniang, ka sadonyo iko, rusio Allah Ta'ala. Tando hari kiamat lah dakek.
Kato Mak Uniang pulo, kito hanyo bisa manyasali ulah parangai si Dorom nan gadang badan baabuak perak tu. Pajo ko lah jaleh bana lawan dek urang siak sa dunia. Kito mintak jo do'a supayo Allah Ta'ala mambari hukuman ka inyo nan gilo tu. Bae lah. Ka bara talok dek inyo. Paja tenggen.
"Nan jaleh, sado awak ko ka mati. Kini kito pa kuek sajolah iman kito surang surang. Jago kawajiban kito kapado Allah Ta'ala. Kasalamatan di akhirat ndak bisa kito mintak toloang ka urang lain. Iko pakaro basangkuik ka amal ibadah masiang masiang," tambah Mak Uniang takalo maagiah wirik, subuah tadi, di Musajik Tawakal.
Kutiko di dunua ko, sambuang Mak Uniang, awak bisa manyalahan urang lain jikok ado kandak nan tasandek. Bisa pulo babimbiang tangan manyubarang batang aia kalau gamang. Tapi di akhirat isuak tu, anggoto badan jadi saksi laku parangai. Ndak bisa basigalia.
Manyubarang titian siratal mustaqim ba itu juwo, jaleh surang surang manitinyo. Ndak bisa bapacik ka karib karabat, handai tolan, sanak sudaro.
Karano tu pulo, tukuak Mak Uniang, jikok awak nio salamat dunia akhirat, mako paliharo sajolah ugamo kito. Jago sumbayang limo wukatu. Jikok laki laki bajamaah di surau atau di musajik gadang pahalonyo.
Sumbayang bajamaah di awa wakatu, Mak Uniang mangutip sabuah hadis, bamanfaat manyalamatkan kito di limo alam. Paratamu, di alam dunia rasaki murah. Kaduo, di alam kubua, kubua wak tarang. Katigo, di alam mizan, manarimo catatan amal jo tangan suok. Kaampek, maniti siratal mustaqim sacapek kilek. Kalimo, masuak sarugo indak bahisab.
Manyalang manutuik pangajian, "Nan maa nan alun sumbayang mako sumbayang lah lai," kecek Mak Uniang sambia madok ka Malanca.
Malanca tasentak. "Ambo lai taruih sumbayang Mak Uniang. Manga lo ka ambo Mak Uniang madok!"
"Yo, indak Malanca nan ambo mukasuik doh. Tapi kawan kawan Malanca nan sampai kini bakaruah juwo di baluiak salimuik. Samantaro wukatu subuah ampia abih," jawek Mak Uniang.
Tambah Mak Uniang, jikok Malanca indak mambaok kawan kawan nan asiak ba abih hari duduak jo hape, untuak sumbayang ka musajik, mako nantik Malanca dituntuiknyo di akhirat.
"Bisa taambek langkah angku masuak sarugo. Karano angku manyari salamat surang sajo," jaleh Mak Uniang.
Malanca tangango....
