Notification

×

Iklan

Iklan

Babudi

14 April 2019 | 09.01 WIB Last Updated 2019-04-14T02:01:03Z
Ditulis oleh: AS Patimarajo

Pasbana.com --- Dulu maso bagolak. Suatu kali di lapau simpang Datuak Tuwo bakisah. Kato baliau, sakali wakatu urang subarang batanyo ka baliau, satantang harago diri urang Minangkabau.

Datuak Tuwo manjawek, harago diri urang Minang tu, mahanyo tak dapek dibali. Murahnyo tak dapek dimintak. Tingginyo ka langik biru. Dalamnyo ka paluang lawik.

Dek urang Minang harago diri hanyo bisa diukua jo raso. Karano tu kok cadiak awak cadiaklah surang, urang ndak batanyo. Kok bagak awak bagaklah surang, urang ndak bacakak. Kok kayo awak kayolah surang, urang ndak mamintak. Kok kuat awak, kuatlah surang, urang ndak latiah.

Jadi nan paralu dek urang Minang tu, budi. Awak bisa baharago di masyarakat bilo lah mananam budi banyak banyak, lah mambuek  baso elok elok.  Nan kurik kundi nan merah sago. Nan baiak budi nan indah baso.

Dek ribuik rabahlah padi. Dicupak Datuak Tumangguang. Jikok iduik indak babudi. Duduak tagak kamari cangguang. Urang babudi tu kalah tahormat, manang bamartabat. Mancaliak jo mato batin. 
Bapikia jo pikiran janiah. Ba itu pituah urang saisuak.

Mak Uniang manarimo kisahko dari Ungku Malin, maso ketek ketek mangaji di surau. 

"Apo  tando tando urang babudi tu, Ngku?" tanyo Mak Uniang maso itu.

Baliau manjawek, "Urang tu jujur indak panduto. Sudah tu, ndak silau jo harato, ndak pulo mabuak dek puja  puji."

"Siapo contohnyo, Ngku?"

"Sarupo ulama nan indak amuah diundang ka istana. Indak amuah diagiah jabatan. Biyalah inyo kalua masuak kampuang badakwah manyampaikan kabanaran," jawek Ungku Malin.

Kutiko carito ko diulang Mak Uniang ka Malanca sudah sumbayang subuah pagi tadi, Malanca maangguak takah urang paham bana. Samantaro matonyo manyirah dek lamo main gim.....
×
Kaba Nan Baru Update