Follow & Like It !

IKLAN

Dunia Sekolah

Si Komi

On Sunday, March 17, 2019

Ditulis oleh : AS Patimarajo

Pasbana.com --- Pagi tadi sudah sumbayang subuah, Mak Uniang batanyo kaba ka Malanca. Jawek Malanca, carito urang di lapau simpang, duo hari kapatang, baibo ibo manusuak hati.

Paratamu,  tantang si Zul jo anaknyo nan  ditembak urang  biadab bahati binatang,  di Linwood Islamic Center di Christchurch, Selandia Baru. Mudah mudahan si Zul dunsanak kito tu, capek baransua sihat, baliau sadang barubek di rumah sakik nagari satampek.

Sudah tu kaba satantang si Komi tukang ulang duwah, nan lah mahanok surang diri di biliak dindiang.  Sajak ditangkok dubalang Jumat  karamat, langsuang malayok tabang masuak kandang jarajak basi.

Ka urang rami si Komi manulih surek, baliau sangajo diparangkok. Indak ado baliau sangko katajadi sarupo iko. Iko rasiko jadi urang gadang, tulihnyo mamuji badan. Urang nan mambaco, galak sengeang mancameeh.

Samantaro kecek dubalang, si Komi lah baulang ulang manarimo sangu dari anak galehnyo nan mintak naiak daun. Takalo dicokok di suatu tampek kapatang tu, si Komi takah mancubo mailak, ka lari lenggang kangkuang. Tapi akianyo tajarek juwo.

Kecek patugeh tukang cokok. Iko cuma puncak kalakuan. Jajaknyo lah banyak didapek i. Lah lamo paja ko kanai intai. 

Komi taruih juwo babuek mungka. Sajak dulu patugeh mairiangan sapanjang nagari. Kini liau tak bisa mailak kanai jarek dek pandeka undang undang.

Kecek kawan samo gadang, mungkin salamo ko si Komi lah minun aia niro pambarian anak ladang. Urang payah mamanjek anau jo sigai batuang, inyo manampuang, tingga minun manyawuak sajo. Lamak bana baliau jadi urang.

Sasuai jo undang nan duo puluah: Anggang lalu atah jatuah. Pulang pagi babasa- basa. Bajalan bagageh-gageh. Kacondongan mato rang banyak. Dibaok ribuik dibaok angin. 

Dibaok pikek dibaok langau. Bajua bamurah-murah. Batimbang jawab ditanyoi. Tadorong jajak manurun. Tatukiak jajak mandaki. Lah bauriah bak sipasan. Lah bajajak bak bakiak.

Dek karano Komi lah manarimo baulang kali, mako  masuak baliau katagori urang jahek. Dalam hal iko lah bauruih bak sipasan, lah bajajak bak bakiak. 

"Lah cukuik bukti dek kami," kecek katua dubalang.

Mungkin disangko Komi, dakek dakek ka panguaso, lah aman sajo babuek sakandak hati. Ruponyo manyipak coki di babak, kawan sabalah coki mamutuih. Disangko paneh sampai patang, kironyo Komi tatangkok manjalang tangah hari.

Banyak urang manakok nakok, ba a Komi jadi takah iko. Salamo ko inyo urang luruih. Ba a kini ko jadi bengkok? 

Kutiko dipikia pikia bana, jaweknyo, lah disabuik Komi sabalun iko. Katonyo, ongkoih bajalan kini agak maha. Sagalo kaparaluan baharago tenggih. Akianyo taambiak nan tidak tidak.

Tapi ado pulo nan mangecek, Komi ko lah talalu bana. Inyo lah jadi urang panduto. Bak kato pituah, bakawan jo urang siak awak tabawo siak. Bakawan jo urang panduto si Komi lah lincah baduto.

"Sakitu kaba pagi kini, Mak," kecek Malanca ka Mak Uniang.
Mak Uniang, haniang.....

Next
« Prev Post
Previous
Next Post »

IKLAN


HUKRIM

Video Moment

INSPIRASI KEHIDUPAN

CARITO LAPAU