Ditulis Oleh : A.S Patimarajo
Lah ka nasip dek Datuak Danau Kamba, ibarat tabu manih ka ujuang. Salamo ko manga mangecek. Indak ado angan baliau nan tatumbuak. Alun langkah baliau nan tataruang. Duo kali jadi Kapalo Dusun, manjago Gunuang Talang, salasai sajo jalan bendi.
Sabalun abih pataunan Kapalo Dusun nan ka duo, baliau tapiliah pulo jadi Kapalo Kampuang. Mauruih nagari dari Sidakak nan Badangkang hinggo Taratak Aia Hitam. Sajak Buayo Putiah Daguak hinggo Sialang Balantak Basi.
Alun abih pulo pataunan sabagai Kapalo Kampuang, baliau diangkek induak samang jadi Tuan Titah mauruih urang sanagari gadang. Dari Sabang sampai Merauke. Sanang bana hati baliau maso itu.
Indak ado lai urang di baliak awak. Baliau bakeh Kapalo Kampuang. Kini baliau pulo malantiak urang sabagai Kapalo Kampuang. Tasabuik baliau urang dareh dari Aceh sampai Papua.
Tapi, sajak Kapalo Baluik ditangkok Pasukan Lidih Tajam, sudah malantak tonggak basi, pakan nan lapeh, lalok Datuak Danau Kamba lah indak lamak. Raso katibo di badan diri rompi supadeh, partando awak urang salah. Namun samantang pun baitu, hati dikuek kuek an juwo. Mudah mudahan layi indak tabawo rendoang pakaro karatu karamat.
Sabananyo, jikok diinok dimanuangkan. Diagak dikanang kanang. Ditiliak bana asamuasa karatu karamat ko, jaleh bana Datuak Danau Kamba nan mambuek usua.
Mulo karajo ka dikakok, kecek Datuak Danau Kamba maso itu, karatu karamat ko, paguno bana dek mukhaluak manusia nan mahuni nagari gadang.
"Karatu ko musti salasai capek. Supayo bisa dipakai anak kamanakan dimaa sajo ado kaparaluannyo. Iko bukan sumbarang karatu," kecek Datuak Danau Kamba maso itu.
Baliau barani mamasang badan, sambia basumpah kok ndak salasai dalam duo musim, inyo siap dibarantian induak samang. Tanyato yo ndak salasai. Tapi induak samang lah tangguang mambarantikannyo.
Pakaro pasang badan, Datuak Danau Kamba yo sabana santiang. Apo lai kok mambiak hati anak kamanakan, baliau pandai mangarang bungo. Sarupo dulu maso kajadi Kapalo Kampuang, inyo mangaku paliang musikin di antaro calon nan sato. Baliau bakato di bawah bawah. Mandi di hilia hilia. Sahinggo tatumpah sayang anak nagari bakeh baliau.
Dek pandai mambagi maso, sarato mangarati jo aturan. Sato pulo maanjuangan alang alang. Mako alun abih maso jadi Kapalo Kampuang, baliau diangkek induak samang jadi urang gadang dalam nagari. Pado maso ikolah takana dek baliau nak mambuek kamudahan ka anak kamanakan. Itulah mukasuik karatu karamat dibueknyo.
Tapi lah tabaco dalam iduik, malang sakijok mato, mujua sapanjang hari. Pajalanan mambuek karatu karamat maninggakan baun amih kecek urang kini. Nampak ado tando ndak salasai dalam paretongan. Kasudahannyo baerak erak dipanggia punggawa jo dubalang.
Samantaro kini, Datuak Danau Kamba, alun talamun dek jalo kaadilan. Baliau manggaliciak paweh, lapeh dari sungkuik tangguak rapek.
"Cubulah buktian kalau ado ambo manarimo uang cindua dari urang rami tuh. Nan ambo ambiak cuma sakadar upah caramah. Hasia titiak paluah nan ambo tampuang," katonyo mandareh ka urang surek kaba.
Jadih molah Ungku Datuak, ba itu kato urang banyak mangamati. Nan bisiak di lapau kadangaran, baso adiak Datuak Danau Kamba juwo lah tapanggia. Tapi ba a kaba sahiah satantang baliau, alun dapek kato pasti.
Curito ko disampai an Malanca ka Mak Uniang, sambia pulang sumbayang Subuah pagi tadi.
"Ba a kiro kiro tu Mak Uniang. Mungkin gak ati, kanai Datuak Danau Kamba ko akianyo?" tanyo Malanca.
Antahlah Nca. Kok kanai pulo baliau, lah bakumpua cadiak pandai awak di dalam mah," jawek Mak Uniang singkek.
"Babeda cadiak pandai awak jaman dulu pado jaman now yo, Mak," timpo Malanca.
"Jaman now, apo tu Nca?" tanyo Mak Uniang heran.
"Maso kini Mak," jawek Malanca sambia sanyum......
Ooohhh....
