Ditulis Oleh : A.S Patimarajo
Sasudah maaja kaji dari pagi sampai tangah hari. Sudah luhua Ungku maaja pulo untuak murik nan lain. Biasonyo sudah sumbayang asa, Ungku Malin maasah sabik di rumahnyo, untuak manyabik rumpuk makanan jawih.
Acok tajadi takalo Ungku Malin maasah sabik, tibo Udin Cawuak. Si Udin ko anak nagari subarang. Sajak bagolak lah bakatahuan jo Ungku Malin.
Udin Cawuak ko, hiduiknyo santai. Walau tabilang lah baumua, tatap sajo inyo iduik surang diri. Indak barumah tanggo. Bukan si Udin mamiliah hiduik surang. Tapi, lah takadia untuang si Udin, takah itu. Inyo ndak pandai bapikia takah urang cadiak pandai.
Karajo Udin sahari hari disuruah suruah urang sajo. Untuak makan, si Udin bilo diagiah urang pulo. Kain baju jo sarawa Udin tagantuang pambarian. Jikok ado paragiah baru, mako nan lamo anyuik di banda aia.
Udin ndak mandi mandi. Dek inyo ndak ado gunonyo mandi. Bilo takapuang kanai hujan, mako basahlah badan Udin. Beko tibo paneh, kariang pulo pakaiannyo.
Bilo sobok jo urang di jalan, di maa sajo, Udin tatap sanyum. Hanyo sakadar itu nan Udin bisa. Galak si Udin ndak pandai, apo lo ka mangecek baandai andai, panjang panjang, takah tukang kumantar dalam tipi.
Abuak si Udin kusuik. Ndak basikek. Di kapalonyo lakek kupiah baludu nan lah pirang. Sarawanyo acok cabiak di balakang. Sabab, kok tibo jalan manurun bukik, si Udin basiluncuih sajo jo sarawa. Tasabab itu sirawanyo acok tabuak tantang ikua.
Ungku Malin acok maagiah Udin sirawa, pangganti nan cabiak tu. Di pinggang si Udin malilik kain saruang usang. Itu juwo acok pambarian Ungku Malin.
Sabanyak itu urang kampuang, anak nagari ndak ado nan amuah mangecek jo si Udin. Mungkin urang bapikia ndak ado mufaat. Sabab, Si Udin dipandang kurang aka. Manga pulo maabih abihan wakatu jo si Udin. Rancaklah di lapau galak bakakah, main koa, badomino bagai.
Hanyo Ungku Malin nan kadok bacurito jo Udin sambia maasah sabik. Kutiko Udin tibo, Ungku Malin batanyo makan si Udin. Sudah tu diambiak an nasi jo aia minum. Ungku bajadi mangecek panjang leba, takalo Udin lah kanyang.
Sakali sakali Ungku Malin nan tasanyum mandanga Udin. Tapi nan si Udin tatap sanyum sambia mangecek. Sadangkan indak mangecek sajo, Udin tatap juwo sanyum sanyum surang diri.
Pado sutu kali, di tahun 1970-an, Mak Uniang batanyo ka Ungku Malin. Manga baliau amuah mahota, baandai, bakucindan jo Udin Cawuak nan tabilang urang bodoh, kurang aka.
Jawek Ungku Malin maso itu, si Udin tu tamasuak urang dikasihi Allah. Allah Ta'ala sangajo malatak an si Udin di alam pikiran nan tapaliharo. Si Udin ndak dimakan hukum agamo. Udin ndak banyak kecek. Tak banyak curito jo urang lain.
Kecek Ungku Malin, kalau awak banyak kecek, banyak sasek. Banyak carito banyak duto. Udin jauah dari itu. Udin ndak pandai mangadele. Udin ndak pandai asuang pitanah. Udin ndak bakandak miliak urang lain.
Udin jauah dari panduto, panyambunyikan, pambinasokan, bidaah, panjang muncuang, mamamer, pandangki, mambangga diri, paharok sarato tamak.
Di akhirat isuak, kato Ungku Malin, si Udin damai damai sajo. Ndak ado inyo bakaluah kasah kanai tanyo pakaro laku parangai buruak, samaso iduik di dunia. Sabab, urang nan ka kanai tanyo tu urang baraka.
Curito ko disampaian Mak Uniang dalam wirik subuah di musajik pagi tadi. Banyak jamaah nan tamanuang. "Jadi nan urang cadiak, banyak aka, di akhirat bisuak banyak kanai tanyo satantang kalakuannyo," tutuik Mak Uniang maagiah wirik.
Sambia pulang Malanca batanyo, "Jadi kalau urang kurang aka tu ndak kanai tanyo dalam kubua, Mak Uniang?" tanyo Malanca.
"Nan ka kanai tanyo tu, urang banyak gadele, mode waang ko Nca," jawek Mak Uniang singkek.
Malanca tamanuang.....
