Ditulis Oleh : A.S Patimarajo
Dulu di tahun 1293 M, bunyi kaba barito, Datuak Mongol manyarang ka Jawadwipa. Anak kamanakanyo bajumlah duo puluah ribu sampai tigo puluah ribu urang. Dikirim jo kapa tongkang maranangi lawik basa.
Dubalang rami tu manbawo ladiang bakilek. Manuntuik baleh. Pangka balanyo, Khubulaikan nan bagala Datuak Mongol tasingguang parasaannyo, karano tigo kali utusan baliau disuruah baliak pulang jo baju salai di badan.
Utusan nan ka ampek banamo Mengki, malah dipotoang talingonyo dek Kartanegara Rajo Karajaan Singosari maso itu.
Mengki samulo disuruah manyampaian pasan, baso Datuak Mongol mintak Kartanegara mambayia uang takuik ka Khubulaikan. Sabagai jaminan, Singosari dijadian bagian dari Dinasti Yuan.
Sabaliak pado itu, Kartanegara urang bagak Jawadwipa maso nantun, manjawek kahandak Datuak Mongol jo caro manyaik talingo Mengki. Talingo tu dibungkuih jo daun kaladi. Dikirim baliak ka Datuak Mongol.
"Toloang waang sampaian, pasan waden ka rajo waang nan buncik paruik tu yo," kecek Kartanegara ka Mengki nan pulang jo daun talingo tingga sabalah.
Khubulaikan manarimo pasan Singosari dari Mengki nan lah bamungko cabiak cabiak kanai turiah. Sudah manumbuak dindiang manahan bangih, baliau mangirim duopuluah ribu tantara mangapuang Singosari.
Sayang, takalo pasukan tu tibo, Kartanegara lah mati. Mambayia utang jadinyo, Jayakatwang nan marangguik Singosari dari Kartanegara.
Sangko hati Jayakatwang ka lamak jadi rajo. Ruponyo manyipak coki di babak. Babaliak awa panabangan. Inyo digantuang ateh kapa dalam lawik dek dubalang Datuak Mongol. Hutang darah babayia darah. Dapek di rimbo hilang di samak.
Sudah maraso manang, tantara Mongol minun arak marayoan kabarasilan.
Dalam kaadaan mabuak mabuak, karancaan bagadang hati. Bapakan pakan, sanda gurau siang malam. Akianyo kamanakan Datuak Mongol lamah badan, panek panek pasandian.
Wakatu ikolah mereka tu dibantai Raden Wijaya nan kudian mambuek Karajaan Majopahit.
Anak buah Khubulaikan mangiro Raden Wijaya nan tadi manunjuak jalan ka rumah Jayakatwang, lah jadi kawan karib. Ruponyo Raden ndak pulo sanang nagarinyo ka dikuasoi dek urang lain.
Kecek Raden nan juwo minantu Kartanegara ko, urang Mongol bagak cuma di ateh pungguang kudo. Kudo kalian ndak bisa lari di ateh lawik. Daerah darek buliah kalian alahan sampai ka Eropa. Tapi Pulau Jawadwipa tatap kami nan punyo. Ba itu padeknyo Raden Wijaya.
Curito ko disampaian Mak Uniang di lapau simpang, sudah sumbayang Isya malam tadi. Sabagian anak mudo mandanga lengah cangok sajo, sabab ndak ado tasabuik Minangkabau nagari awak dalam kisah nan disampaian Mak Uniang tu.
Kutiko banyak anak mudo cando basilengah, Malanca batanyo, "Raden Wijaya ko, siapo inyo, Mak?"
"Mangko curitonyo Nca. Sabalunnyo Singosari ko, manyari kawan ka Swarnadwipa sampai ka Minangkabau. Dalam pado itu, Rajo Mauliwarmandewa mangawinan duo anak gadihnyo: Dara Petak, Dara Jingga jo bangsawan Singosari.
Kabanyo, Dara Petak tu dipasuntiang Raden Wijaya. Samantaro anak Dara Jingga konon banamo Gajah Mada, nan kudian dipicayo jadi patih dek Hayam Wuruk," kecek Mak Uniang manyambuang curito.
"Jadi barati kan urang sumando awak juwo tu Mak?"
"Tantu lah jaleh sumando awak, baliau mah," jawek Mak Uniang lunak.
"Kok ba itu, urang sumando awak ko lah santiang sajak dulu yo, Mak?"
"Yo, Nca, urang sumando awak jak dulu santiang santiang. Cuma cadiak pandai awak sajo, nan suko maanjungan urang lain," jawek Mak Uniang sambia malucuih kalua lapau.
"Kok tibo kamanakan Datuak Mongol tu rami rami sadang bak kini, kama dicari sumando nan sabagak Raden Wijaya tu, Mak?" tanyo Malanca bayo bana. Samantaro, Mak Uniang lah jauh, ndak mandanga.
Malanca baturo dalam hati. Curito tagantuang Mak Uniang lari....
