Ditulis Oleh: A.S Patimarajo
Sarik batanggang salamoko, malam tadi Mak Uniang maikuik bana tandiang bola Kroasia lawan Rusia. Samo samo santiang mainnyo. Bakasudahan adu pinalti. Krosia manang 4:3.
"Main bola ko yo paralu wak contoh Nca," kecek Mak Uniang ka Malanca sudah nonton di lapau simpang manjalang subuah.
Sabab, kecek Mak Uniang, nan maa nan santiang, itu nan barahak dapek piala. Beda jo mamiliah pamimpin musim demokrasi. Asa ado kurisi puncak ta lowoang, nan baminat duduak di tampek nan tinggi tu, bisa mambiak jo suaro tabanyak. Kalau main bola diadu bana dulu, kok yo layi manang, mako dapek inyo piala juara.
Untuak jadi juara tu, ndak bisa jo lobi lobi partai. Ndak bisa jo koalisi, tim sukses. Tapi musti bakarajo kareh. Lah disiapan bana sajak batahun tahun sabalunnyo.
Mak Uniang sakali wukatu dulu mangecek bacurito jo pamain PSP Padang angkatan 70-an, Almarhum Zulfar. Panggilan baliau Pak Cun. Main bola ko, katonyo, urang Jerman mamulai umua ampek tahun. Anak sagadang itu lah masuak barak, diasuah main bola.
Wakatu anak anak baumua anam tahun, lah ado kompetisinyo. Ba itu sataruihnyo umua lapan tahun, sapuluah tahun, duo baleh tahun. Jadi nan ka jadi pamain tu sajak umua ampek tahun lah dibina.
Tanbah lo curito guru Mak Uniang, sangkek sikola dulu, Almarhum AN Dt. Indomo, maso tahun 70-an baliau Katua AMPI Kota Padang. Keceknyo pulo, di Swedia, untuak kota tingkek duo. Ukuran Padang Panjang jo Sawahlunto, itu masiang masiang ado duo baleh buah lapangan bolanyo. Satiok patang hari panuah barisi anak anak main bola.
Ado lo guru Mak Uniang, Purwo Santoso, mangecek an, kalau di Inggris tu, satiok pakan ado tandiang bola di kota kota, nan rami ditonton masyarakat. Mungkin jikok dibandiangan jo di nagari awak ko, samo urang bakumpua kutiko Ustad Somad maagiah pangajian. Makonyo kompitisi sipak bola di lua nagari tu, bagairah. Mariah.
"Jadi ba a manuruik waang, Nca. Takah itu urang manyiapan pamain bola di lua nagari," tanyo Mak Uniang ka Malanca sudah sumbayang subuah pagi tadi.
"Biya sajo lah urang lua nagari tu gilo jo bola, Mak. Dek kito akhirat sajolah kito pa kuek. Dunie ko samantaronyo," jawek Malanca.
Mak Uniang tapana....
.jpeg)
.jpeg)