Ditulis Oleh : A.S Patimarajo
Rubella atau disabuik juwo campak Jerman, kecek urang kasehatan marupokan infeksi virus nan ditandoi ado bintiak sirah atau manyirah di kulik. Rubella ko umumnyo menyarang anak-anak jo ramaja. Akibatnyo mandaman, patah salero makan.
Menuruik info WHO, pado tahun 2016 di Indonesia lebiah dari 800 kasus rubella nan alah takonfirmasi melalui pemeriksaan laboratorium. Karano tu anak anak supayo ndak kanai dek panyakik rubella ko di maso kan datang, musti disuntik. Itu lah caritonyo di maso kini di tahun 2018.
Mandanga kaba nan sadang angek ko, takana dek Mak Uniang maso ketek ketek. Sakitar ampek puluah tahun nan lampau, di tahun tujuahpuluahan, Mak Uniang acok damam. Badan angek, makan ndak amuah. Salero paik. Sainggo kadok mande Mak Uniang baulang ka rumah Mak Sughin.
Tingga baliau di kampuang sabalah. Sahari hari Mak Sughin batani. Ka sawah jo ka ladang. Biasonyo sudah sumbayang asa, inyo lah duduak di rumah. Kok ndak sobok di rumah, mungkin di lapau minun kopi.
Kalabihan Mak Sughin, baliau tahu ramuan ubek. Sahinggo banyak urang mintak ubek ka baliau. Tapi nan tamusahua bana, inyo maubek campak lari ka dalam. Mungkin samo jo rubella istilah kini. Urang kampuang manyabuiknyo kanai. Kanai campak.
Kalau lah tibo di Mak Sughin, ramuan ubek nan baliau mintak, paratamu sakali tawa nan ampek: sitawa, sidingin, sikumpai, sikarau. Tambah aia karambia mudo jo talua ayam kampuang. Ramuan ko dimantokannyo babisiak bisiak. Diambuihnyo dalam dalam.
Sabalunnyo, sitawa, sidingin, sikumpai jo sikarau dipotoangnyo jo pisau. Disiram aia dingin. Diasok jo kumayan. Beko kapado anak nan sakik disuruah minum tigo raguak. Dimandikan basah basah sabatang tubuah. Sudah itu baru diminum sagaleh air karambia mudo jo talua ayam kampuang.
Jikok lah diminum duo kali sahari. Salamo tigo hari. Mako damam mulai hilang. Kalau campak tu lari kalua kulik, langsuan nampak manyusuik.
Lapeh dari tigo hari, lah abih ramuan, diulang baliak ka Mak Sughin manambah ubek. Biasonyo baliau manyuruah baliak bawok ramuan nan sabalunnyo. Hanyo sajo talua ayam karambia mudo, diganti jo kundua manisan labah.
Pamakaiannyo sarupo tadi juwo. Tawa nan ampek dimunum tigo raguak, dimandikan basah basah. Kundua diparuik disariang aianyo sagaleh kaki limo. Sudah tu dicampua manisan labah tigo sendok. Minum ramuan ko duo kali sahari. Pagi jo malam hari. dipaturuik an salamo tigo hari.
Salamo minum ubek. Di rumah ndak buliah ado asok minyak. Karano tu, saisi rumahan manahan salero indak makan nan digoreang. Tapasolah mande Mak Uniang makan gulai jo uwok sarato abuih abuih sajo.
Duo kali barulang ka Mak Sughin. Biasonyo damam lah mulai rado. Barakat do'a Mak Sughin dikabulkan Allah Ta'ala sakik Mak Uniag hilang. Badan baliak sarupo biaso.
Tapi, antah apokoh sababnyo. Tahun barikuik Mak Uniang mandamam pulo baliak. Batirik tirik hinggo mak Mak Uniang akia balig. Salamo damam tu tibo, mande Mak Uniang baulang ulang ka rumah Mak Sughin. Kadang lah ibo pulo Mak Uniang maliek mande jalan kaki sakilo labiah manenteang ramuan ubek.
Takalo Mak Uniang lah sikola manangah ateh, urang mambuek puskesmas di kampuang. Di sinan ado mantari maagiah resep ubek. Sajak itu pulo Mak Uniang ndak barubek ka Mak Sughin.
"Makin hari batambah maju. Sampai ado imunisasi campak. Disuntik anak anak maso ketek, supayo lah gadang ndak kanai campak. Hasianyo yo nampak, lah kurang anak anak kanai campak. Jikok dulu tu, banyak muko anak capuak capuak kanai campak," kecek Mak Uniang ka Malanca sudah sumbayang subuah di Musajik Al-Munawarrah pagi tadi.
"Yo rancak ubek suntik tu hasianyo yo, Mak. Bisa maubek sabalun kanai. Tapi itu layi halal tu, Mak," tanyo Malanca.
"Itulah Nca. Awak ndak mancaliak apo bahannyo, baapo pulo caro maracik ubek suntik tu," jawek Mak Uniang.
"Kalau ubek Mak Sughin layi apa dek Mamak do'anyo?" tanyo Malanca takah baiyo bana.
"Kok apa bana do'anyo. Ndak ka ado urang barubek caro dulu tu doh, Nca. Ramuannyo maha," baleh Mak Uniang.
"Dimaa pulo latak mahanyo, Mak?"
"Harago talua ayam naiak kini, Nca."
"Kok baitu, rancaklah suntik perai sajo. Tapi yo nan halal, Mak," kecek Malanca sambia mamisah jalan ka rumah.
Waang kok ka perai tu kancang, bisiak Mak Uniang dalam hati....
.jpeg)
