Salain harimau nan salapan, ado lo curito khayal tantang kancia nan sapuluah. Tasabuik dalam kisah lamo, dulu maso saisuak, ado sapuluah Tuan Luhak, manekan surek, mandukuang Datuak Pucuak untuak tapiliah kaduo kali jadi Rajo Alam. Mako lakeklah itam di ateh putiah. Kajadi tando baso baliau tu satia ka urang ateh.
Mungkin, jikok dibalah dado urang nan sapuluah tu, antahlah. Saluang jo rabab sajolah nan manyampaian. Tapi karano hari itu, baliau takapuang ujan di rumah bagonjoang, mako ndak dapek mailak pintak, kahandak Mak Pono si tuan rumah.
Mak Pono nan mamacik tampuak ranah, mangaluaan surek dalan lamari. Dalam surek tu tatulih ampek baleh namo Tuan Luhak. Jikok dietoang bana kasadonyo Tuan Luhak ko sambilan baleh urang. Ampek baleh nan naiak ka rumah Mak Pono. Sapuluah nan amuah maagiah tandotangan.
Nan lain acuah tak acuah. Manulak indak. Sato pun tidak. Mungkin dalam hati, nan lain tu mangecek, kito ko punyo rusio jo raso surang surang. Raso dibawo naiak. Pareso dibawo turun. Tenggang pulo parasaan urang jikok awak malapeh kandak. Dek manjago raso ko pulo, mungkin, nan sambilan ko, mamiliah antok sajo.
Sudah lakek itam ateh putiah, surek disimpan dek Mak Pono, rancana untuak dicaliak an ka Rajo Alam, jikok tibo liau bakunjuang pakan muko. Sakadar untuak manjawek tanyo induak samang, lah ado dek Mak Pono. Ba a hasia dari surek tu kamudian hari, itu lain curito. Pendeknyo, nan kini yo kini. Isuak tu yo isuak. Di maa tumbuah sinan disiangi.
Kutiko dicubo manyigi apo bana isi surek tu, Mak Pono antok sajo. Baliau tak amuah mangecek tantang surek nan ditekan anak buahnyo nan sapuluah urang tu. "Ijan iko lo nan ditanyo lai. Surek biaso sajo tu nyo," ilak Mak Pono nan tasabuik santiang baimain pantun, sambia jalan malucuih di salo salo ruang rumah bagonjoang.
Samantaro, si Sulan, nan sato lo manekan surek tu, mangecek ka tukang kaba, baso ndak ado carito dukuang mandukuang dalam isi surek. Cuma ucapan tarimokasih ka Datuak Pucuak salaku Rajo Alam, nan alah banyak manoloang kampuang.
"Kan alah samo kito caliak mah, dari Sialang Balantak Basi hinggo Durian Ditakuak Rajo. Sajak Taratak Aia Hitam hinggo Sikilang Aia Bangih. Sadonyo manarimo pambarian Datuak Pucuak. Kan patuik pulo kito batarimokasih ka baliau," kecek Sulan panguaso Bukik Ateh Ngarai.
Jikok diinok manuangan kecek Sulan ko, yo saraso takah ka iyo bana. Walau dalam surek tu tatulih mamuji Datuak Pucuak satenggih langik. Itu namonyo pandai pandai manitih buah, supayo salamat badan ka subarang.
"Datuak Pucuak paralu surek, diagiah molah. Baliau mintak dukungan kito, kito dukuang molah di ateh karateh. Jaleh pulo itam di ateh putiah. Aa juwo dek inyo lai? Tapi kok mintak pulo isi hati anak nagari, tantu payah maukuanyo," kecek salah surang karabat Sulan maso itu.
Kutiko kisah ko diulang Mak Uniang ka Malanca sudah sumbayang subuah pagi tadi, malanca batanyo. "Apo mukasuik surek tu, Mak?"
"Biya saelah, Nca. Iko kungfu tingkek dewa ko mah," jawek Mak Uniang acuah tak acuah.
"Apo lo jurusnyo tu, Mak?"
"Jurus tagak di pintu. Samo jo incek cubadak bagomok," baleh Mak Uniang sumbarang kanai.
"Bisa banyak dapek bantuan tu, Mak?"
"Iko baru maneba jalo, Nca," jawek Mak Uniang pontoang.
Malanca leno....
.jpg)
