Notification

×

Iklan

Iklan

Banyak Kilah

28 Oktober 2018 | 13.58 WIB Last Updated 2018-10-28T06:58:14Z

Ditulis Oleh: A.S Patimarajo


Pulang sumbayang subuah di Musajik Tawakal, pagi tadi,  Mak Uniang bakisah ka Malanca sapanjang jalan. Sambia maraton palapeh rangkik rangkik, tasabuiklah babarapo  carito maso lampau.

Suatu kali, kato Mak Uniang, mandiangko Ungku Malin nan maaja di surau baru, mangecek dalam wirik pangajian, baso urang nan banyak kilah di dunia ko, di akhirat isuak dimasuak an Malekat Malik ka narako dalam pariuak nan sadang tajarang. 

Kutiko tarapuang apuang manggalagak samo jo aia angek. Si Banyak Kilah tadi, mandawa Malik.  Apo salahnyo mako inyo diabuih sampai taseso dalam pariuak? 

Jawab Malekat, "Kami ndak maabuih waang doh, nan kami abuih cuma aia dalam pariuak. Kalau waang mintak kaadilan, tanyolah ka pariuak tu, manga sampai waang ado di dalam aia manggalagak!?"

Si Banyak Kilah akianyo takana maso inyo iduik di dunia. Ado sakali wakatu anak anak mangaji bakumpua di tanah lapang. Sorang dari nan banyak tu, mam bawo daun pisang untuak balinduang hari paneh. 

Daun pisang tadi dirabuik dek kalompok Banyak Kilah, digarumeh dibakanyo sambia bajoget joget di nan rami. Nan punyo daun pisang manuntuik, ba a mako daunnyo dirampeh, dibaka, samantaro inyo paralu daun pisang tu untuak unduang unduang hari paneh.

Jawab si Banyak Kilah,  inyo  ndak bamukasuik mambaka daun, cuma mambaka talutuak. Kabatulan daun ko malakek ka talutuak pisang. 

Kurang pueh jo jawaban takah tu. Nan punyo daun manuntuik kaadilan ka panguaso. Jawab panguaso, samo jo Banyak Kilah. Nan dibaka tu talutuak pisang, ndak daun pisang. 

"Tapi, Pak. Iko daun jo talutuak tu kan punyo ambo. Manga dirampeh, digarumeh, ambo paralu," sasak nan punyo daun.

"Jiko diusuik bana, nan salah tu waang. Manga waang bao daun pisang tu. Kok tak dibawo, tantu ndak kanai baka doh," jawek panguaso, nan kabatulan mamak dek Banyak Kilah.  

Karano tu, kecek mandiangko Ungku Malin, awak ndak buliah banyak kilah. Kok lah salah awak, mintak maoh sajolah. Sasek suruik, salah kumbali. Abih maoh bakarilaan. Untuak apo awak basitagang urek mariah managak an banang basah. Isuak di akhirat ka kanai juwo jo hukuman.

Tapi samantang pun baitu, kecek Ungku Malin, dalam iduik di dunia ko, ado tigo macan urang nan tak buliah kito lawan: urang sadang bakuaso, urang sadang kayo sarato urang nan sadang gilo. 

Jikok sobok ka lorok jo nan tigo ko, pado batangka ancak anok. Sabab, tagak bana wak di nan bana. Beko baentoang entoang, kalah juwo kasudahannyo. Urang tapacik di ulu, awak tapacik di mato, disentak saketek luko tangan awak.

'Ba a, layi masuak dipangana waang pangajian ko?" tanyo Mak Uniang ka Malanca.

"Lai layi, Mak," jawek Malanca tasentak. 

Mak Uniang takah ragu. Pangana Malanca antah ka maa...
×
Kaba Nan Baru Update