Ditulis Oleh : A.S Patimarajo
Kaba kaba angin, dulu maso bagolak, tasabuik Etek Tana bagala Upiak Paik. Sahari hari manggaleh goreang. Inyo tagak di suduik simpang. Ciek kakinyo sabalah kida, ciek lai sabalah suok simpang. Jiko urang mintak dari kida, sabanta nyo madok kida. Takalo urang bakandak dari suok, sabanta pulo inyo maengoang ka suok.
Ba itu lah tagak Upiak Paik. Saligi baliak batimba. Tak ujuang, pangka manganai. Adang dapek satandan labek dari suok jo kida. Ibaratnyo padi masak jaguang, maupiah. Taranak bakambang biak, pukek manganai anak kabau. Kadang dari suok sajo. Kadang dari kida sajo. Pokoknyo jarang taruah tak maelo.
Jikok dicaliak, galeh Upiak cuma goreang pisang, tambah setek kecek jo ota. Tapi kawannyo urang tamusawua dalam kampuang. Datuak Kayo calon kapolo nagari sagan barek ka baliau. Mak Inggih nan jadi Ungku Palo kerek bana dek Upiak Paik. Apo lai urang gadang nan sadang ado masalah. Tabik paluah likek dibueknyo.
Ba a mangko bisa takah tu? Karano di lapau Mak Karani tangah kampuang di simpang ampek, Upiak Paik bisa malapeh kecek. Kato katonyo bunyi paluru manembak tenok. Kurenahnyo bak mariam manambah takuik. Urang nan maleh kanai tuja dek Upiak, biasonyo maagiah rimih sabangkak pambali badak.
Suatu kali takalo payi ka dangau mancaliak parak, sambia bauruik di ujuang kampuang, Upiak Paik dipantak panyangek. Mukonyo sambok. Labam mambuek matonyo ilang. Dukun uruik tadi sangajo mamantak muko Upiak, supayo nan kandua bisa tagang.
Sapakan bakuruang di rumah, Upiak tak kalua kalua. Salamo tu pulo kadai ndak babukak. Dicaliaknyo saku lah lapang. Dipandang camin malam hari ka lalok, bangkak mato alun ilang. Mako tibolah siasek di hati Upiak. "Mato bangkak ko bisa waden dijuwa ko mah," bisiaknyo samo surang.
Barisuak pagi, anak galeh Upiak, batutua ilia mudiak dalam nagari, mangecek baso Upiak Paik ditinju dek jihin mukaluak haluih. Kaba bateba dalam kampuang, baso mukonyo bangkak, matonyo bangkak, paruiknyo dilicak licak, badan tacampak tapi jalan.
Carito ko sampai ka Datuak Kayo nan sadang mamatuik matuik badan. "Ba a kajadiannyo Piak?" tanyo Datuak urang nan kayo murah hati, kutiko batandang manjanguak Upiak nan baransua sihat.
Upiak mulai mangarang lagu lamo. Bagana bagini babalik balik. Dari ujuang lapeh ka pangka. Dari pangka baliak ka ujuang. Sampai kecek ko baranti di ubek minyak angin cap kudo ameh. Harago minyak agak maha pado biaso.
Tipak nan dari Datuak Kayo, pakaro ringgik jo wang piyah pambali minyak angin, itu sangeneang sakenek bana. Namun samantang pun ba itu, nan paralu dek inyo, sadang bak kini, mukaluak haluih nan maninju Upiak musti dimintak batangguangjawek. "Iko paralu ditangani dek urang pandai. Kok dipabia sajo, bisa kacau kampuang kito diusai usai mukaluak tu," kecek Kayo nan tamakan siasek Paik.
Sapaningga Datuak Kayo, mungkin pambali minyak nan tadi dijuluak alun juwo rareh, mako barisuak harinyo, Upiak sangajo mandi ka tapian. Sudah mandi inyo mangecek ka urang rami, baso inyo ndak ado bagai kanai tinju doh.
"Ambo dipantak panyangek. Mukaluak haluih tu ndak ado bagai maninju ambo doh. Ambo mintak maoh ka Datuak Kayo jo kawan kawan. Ambo cuma bagarah garah. Tapi dek kawan kawan masuak hati bana," kecek Upiak manjapuik kato nan dikarang.
Mandanga kecek dari Upiak, saisi nagari buncah. Biya di tapian tampek mandi. Atau di kadai minun kopi. Carito urang sapakan tu, Upiak Paik sajo. Sampai ado nan mangkaji, dari maa Upiak dapek kepeang salamo ko. Galeh goreang sanjo sanjo di simpang duo, bisa mambali bendi jo kudo kudonyo. "Jan jan salamo ko, galeh goreang ko topeang sajo. Nan dijuwa sabananyo hanyo carito duto!" bisiak bisiak urang kampuang.
Kutiko kisah ko diulang Mak Uniang ka Malanca sudah sumbayang subuah pagi tadi, Malanca batanyo, "Upiak Paik tu dulu anak pangguang yo, Mak?"
"Iyo, Nca. Inyo tasabuik maso mudo pandai sandiwara," jawek Mak Uniang.
"Salain sandiwara, apo sae karajo baliau, Mak?"
"Manggaleh ota, Nca," jawek Mak Uniang basicapek.
"Manggaleh ota! Bba a caronyo tu, Mak?"
"Waang kok ka manggaleh nan luruih luruih sajolah, Nca. Ijan waang tanyo lo nan tu lai," baleh Mak Uniang takaja pulang.
Malanca tananang.....
.jpeg)
.jpeg)
