Ditulis Oleh : A.S Patimarajo
Manjalang repormasi dulu, batahun tamat sikola, Mak Uniang ilia mudiak maukua jalan. Tabiang tinggih buek didaki. Lambah ngarai dituruni. Unjua anja malinteh Sumatera Jawa. Naik oto tambangan pulang payi.
Ka Blok M jo Tanahbang, ka Cipulir jo Cileduk. Nan galeh tauncang taruih. Ditahan juwo di rantau, hati kareh paruik badampuang. Angan lanteh, paham tatumbuak. Akianyo manyarah kalah, baliak kanan pulang kandang.
Kaganti panjawek tanyo. Pantai puruih mandayo dayo. Marapi Singgalang maimbau imbau. Nan labiah manariak, baco koran di Imam Bonjol. Bakaja impo sasamo gadang. Rumah bagonjoang jadi sasaran. Sakali sakali, taragak makan randang, buatan Mande dikaja pulang.
"Daripado ilia mudiak sajo taruih manaruih. Minyak abih samba tak lamak. Arang abih basi binaso. Rancak waang barumah tanggo sajo. Maingek wukatu taruih bajalan. Umua samakin tambah laruik," saran Mande Kanduang tibo di kampuang.
Alun talakik badan manjawek, Mande langsuang manyambuang kecek. "Bialah waden manangguang alek. Tamasuak balanjo dapua pangantin pakan ka pakan. Jikok gantuang waang jo pitih, sabuik sajo, biya Mande maakayi," kato baliau maso itu.
Mandanga pitutua takah piluru, raso ndak mungkin dapek ditangkih. Tak ado caro untuak mailak. Akianyo dianta biduak ka subarang, Mak Uniang jadi marapulai.
Sasuai Mande mambuek garih, ijan sampai malompek kalua banda. Hanyo sahinggo ombak nan badabua. Singkeknyo nan salingka ranah bundo.
Mandanga kisah sarupo iko, satiok bacarito sudah sumbayang. Akianyo, Malanca bukak karatu ka Mak Uniang, sudah sumbang subuah, bulan nan lapeh.
"Lah ado nampak di awak, Mak. Tingga mamak sajo lai, payi maetoang ka rumah anak urang tu," kecek Malanca taruih tarang.
Mako bajalanlah Mak Uniang, ka rumah rang gaek anak urang tu.
"Jikok buliah kami batanyo, apo garangan Mak Uniang tibo batamu ka rumah ambo," tanyo apak nak urang tu agak ragu.
"Bukan kinari kinari sajo, iko kinari nak urang padang. Bukan ambo kamari baitu sajo, gadang mukasuik ka dijalang," jawek Mak Uniang jo kato bayang.
"Jikok ba itu kato Mak Uniang. Apo bana garan mukasuik nan gadang tu. Taraso di kami manarawang di nan kalam," baleh apak nak urang tu marasoki.
"Di kami manaruah sadah jo tambakau, tipak di apak ado siriah pinang. Ba a kalau kito himpun sajo dalam carano," kecek Mak Uniang maminteh kecek.
Sajak itu, putuih etongan. Bulan muko Malanca baralek.
Kaba ko bateba dalam kampuang. Sudah senam di tanah lapang. Ado nan batanyo ka Mak Uniang. "Yo, ka barakek Malanca, Mak Uniang," tanyo ibuk tu.
"Inshaa Allah kok ndak ado halangan," jawek Mak Uniang.
"Sabananyo, awak nio lo Malanca jadi minantu awak mah," baleh ibuk tu, sambia bapasan, mintak kamanakan Mak Uniang sorang lai, nan sarupo Malanca taat sumbayang.
Mak Uniang tasanyum. Ruponyo Malanca salamo ko jadi paratian...
.jpeg)
