Notification

×

Iklan

Iklan

Pilem India

21 Juli 2019 | 13:19 WIB Last Updated 2019-07-21T06:19:06Z
Ditulis oleh: AS Patimarajo

Pasbana.com - Sudah sumbayang isa, Mak Uniang duduak sabanta di lapau simpang,  malam kapatang.  Banyak didanga carito nan ganjia ganjia.  Maklum sajo carito di palanta, manyemba kamari payi.  Antah dimaa tibonyo kaba,  ndak paralu diusua bana.  Nan pantiang kisah dikambang kopi dihiruik.

Mak Kari  mulai bacarito,  kato baliau,  jikok diinok dimanuangkan, diagak dikana kana, banyak tajadi nan ganjia ganjia maso kini. Sarupo anak nagari tacampak karajo di pabirik basi. Samantaro urang lain, kabanyo, batambah bakarajo di sinan.

Ado lo anak buah suruhan urang kayo malapia pangulu di balai adat jo kabek pinggang. Induak samangnyo kalah pakaro, anak buah manggaletang indak manarimo. Antah sia nan maasuang,  mako pajako bagak bana.

Tambah pulo  simin untuak manembok gumah,  harago murah tibo dari nagari lain. Simin awak mulai dapek lawan. Lamo lambek kalau tak laku bisa mati pabirik. Akianyo tantu dilego ka urang lain. Alasan daripado jadi basi tuwo.

Barang barang di pasa mulai ndak laku.  Alah  dibuek toko rancak rancak, tapi galeh tatap ndak tajuwa.  Sabab urang tatariak mambali onlen. Harago murah, barang capek tibo dianta sampai ka rumah. Tantu pulo nan dipasan tu barang dibuek urang lain. Pulsa untuak mamasan tu juwo asanyo punyo urang lain.

Sudahlah takapuang awak jo dagang onlen.  Kadai galeh kumango punyo urang lain tu, bateba pulo di sapanjang nagari. Tambah bungo karedit motor diisok antah kamaa payinyo.

"Kabanyo sado labo jo bungo tu lari ka saku sipiciang nan sajak dulu tasabuik banyak aka," kecek Mak Kari.

Urang salapau mandanga tananang.

Dalam pado itu,  Mak Kudun tibo manyolo. Kato baliau,  kutiko mariah anak nagari lah dipacik dek urang lain, mako inyo bisa babuek sakahandak hati. Taradok kalakuan urang lain tu, panglimo,  upeh jo dubalang ndak madok taji.

"Takah dalam pulem india,  Letoy  dubalang  madok ka juragan. Itu  mulo kaadilan ko lanyok," kecek Kudun.

"Tapi iko lah sunah dari alam takambang. Barubah rubah bateh. Lain lain nan bakuaso,  itu lah sipat pado musim," kecek Mak Kari manutuik carito.

Kutiko diulang Mak Uniang ka Malanca sudah sumbayang subuah di Musajik Tawakal pagi tadi,  Malanca batanyo, "Jadi apo kiro kiro nan ka tajadi sudah iko, Mak?"

"Hiduik ko samo jo main bola, Nca.  Kalau indak manyarang mako awak kanai sarang. Sia nan kanai sarang acok kalah," jawek Mak Uniang.

"Jadi kini awak kalah tu, Mak? "

"Awak hebat, Nca. Dimaa lo bisa kalah," baleh Mak Uniang tanang.

Malanca ragu,  antah iyo batua jawek Mak Uniang ko antah indak. Malanca lah acok kanai ance....