Makan Maco

Penulis : A.S Patimarajo

Kecek urang,  dulu sudah bagolak, macam macam nan tajadi di nagari. Paratamu, pasa ka dipindahan Ungku Palo. Kaduo, anak ujuang kampuang manggaretak mintak bagian. Katigo,  iyuran sakik batambah duo kali lipek. Ungku Malin kutiko itu sibuk mauruih surau. Baliau ndak dapek informasi.

Suatu kali sudah sumbayang insya sambia jalan pulang dari musajik,  Mak Uniang  batanyo ka Ungku Malin, "Apo kaba nagari kini ko, Ungku?"

"Waden sibuk mauruih surau,  lah sabulan manjago tukang karajo. Ndak tantu dek waden kaba nagari tu lai," jawek Ungku lambok lambok amba. 

Mak Uniang mandasak,  "Kok ndak ado carito baru. Carito lamo maso saisuak bagai lah, Mak. Pado haniang sajo wak bajalan ko."

Sudah tu,  Ungku Malin bakisah tantang carito mamiliah rajo. Maso tahun katumba,  ado Rajo Tuwo ampia mati. Inyo manyari panggantinyo payah. Sabab anaknyo samo gadang,  sarupo pulo bantuak roman muko. Sadonyo mangaku anak suluang.

Mako dari itu, batitahlah Rajo Tuwo mintak pituah ka Tukang Ramal, siapo dari sabaleh anak laki laki, itu nan patuik manggantikannyo.

"Jadih paduka. Syaratnyo buek alek gadang. Hidangan samba sagalo macam dagiang binatang. Sudah tu latak pulo di meja hidangan tu goreang maco," mintak Tukang Ramal.

Pakan barisuaknyo alek gadang tu dibuek di muko istano di tanah lapang. Masyarakat tibo tumpah ruwah. Anak nagari  makan kanyang tujuah hari tujuah malam. Anak anak rajo pakai pakaian kabasaran manuju hidangan satiok kali makan. Pangawal mancatat apo sajo samba nan dimakan anak rajo.

Sasudah alek dibuek,  Tukang Ramal mintak catatan Pangawal tadi. Sudah dibaconyo, Tukang Ramal mambuek saran ka Rajo Tuwo.

Anak nan suko jo dagiang jawih, parangainyo malanguah bilonyo awih. Anak nan suko dagiang kabau parangainyo bakubang kutiko paneh. Anak nan makan dagiang kambiang,  takuik basah kanai hujan. Anak nan suko makan ayam, kukuak sajo nan kareh, tanago lamah.

Anak nan suko makan baluik, galia payah dipacik. Anak nan suko makan itiak aia,  sanang manyudu aia kumuah. Anak nan suko makan itiak sarati,  banyak lenggok pado lari. Anak nan suko makan puyuah,  panyuruak di nan rami. Anak nan suko makan marpati,  banyak gaya pado budi. Anak nan suko makan balam, carito sajo nan banyak hasianyo kalam.

Rajo Tuwo maangguak angguak mancaliak catatan Tukang Ramal. Lah sampai nomor 10 indak ado anaknyo nan sasuai alua jo patuik jadi panggantinyo.

Tarakir di bawah bana,  ado surang anak tasabuik makan jo maco sajo salamo alek gadang tu balangsuang. Tapi katarangan dari Tukang Ramal ndak ado dalan catatan tu.

Kutiko kisah ko diulang Mak Uniang ka Malanca sudah sumbayang subuah pagi tadi,  Malanca batanyo, "Kalau baitu sia kiro kiro nan patuik pangganti  rajo tu, Mak?"

"Tantu nan makan jo maco, nomor tarakhir tadi," jawek Mak Uniang.

"Ba a mangko ba itu,  Mak?

"Maco tu lah biaso diampeh ombak. Lah biaso diancam ikan gadang. Tapi inyo tatap main di muko lawik,  di aia janiah,"  baleh Mak Uniang.

"Kalau ado rajo tu, dikandalian dek urang lain,  apo kiro kiro nan dimakannyo,  Mak?"

"Kok itu, yo ndak tantu dek waden doh, Nca. Tanyolah ka Tukang Ramal," jawek Mak Uniang sambia malucuih jalan manyimpang...