Ditulis Oleh : A.S Patimarajo
Maso tu, kakuasaan Romawi di sapanjang Jazirah Arab, lah tunduak dibuek Umar bin Khatab. Panglimo parang Abu Ubaidah bin Jarrah, sarato 35.000 pasukan, sadang maintai Kota Yerusalem, nan disabuik Baitul Maqdis atau Al-Quth, di Palestina.
Di bawah Abu Ubaidah ado tujuah panglimo lain: Khalid bin Walid, Yazid bin Abu Sufyan, Syurahbil bin Hasanah, Mirqal bin Hasyim, Musayib bin Najiyah, Qais bin Hubairah, Urwah bin Muhalhilja. Masiang masiang punyo 5.000 prajurik. Sadonyo pandeka baiman taat ibadah.
Karano ndak dapek duduak bakisa. Satiok malawan buluih taruih. Mako Panguaso Yerusalem maso tu, Uskup Aguang Sophronius salaku parwikalan Bizantium Romawi, manyarah. Inyo bamohon supayo Amirul Mukminin Umar bin Khatab datang manarimo kunci kota suci, nan lah labiah satahun dikapuang pajuang Islam.
Sasudah mambaco surek Abu Ubaidah, Amirul Mukminin Umar bin Khatab musyawarah jo sahabat lain di Madinah. Kaputusan mufakat, baliau dikawal sorang ajudan barangkek ka Yerusalem.
Sabulan pajalanan manampuah jarak duo kota itu, Umar baganti ganti manaiki saikua unto jo pangawal tadi. Takalo Umar di ateh pungguang unto, pangawal mairik tali. Kutiko Umar mamacik tali, pangawal di pungguang unto.
Ba itu sataruihnyo sampai ka kota Nabi Daud jo Nabi Sulaiman tu. Pagantian ko tajadi sakali baco surek yasin. Tamat yasin, batuka panunggang.
Satiok malinteh pakampungan, Amirul Mukminin disambuik jo pasambahan, disuguahi carano basa dek panguaso jo panduduak satampek. Tapi Umar tatap sajo Umar. Baliau mamiliah duduak malapeh rangah di musajik. Banyak nan mintak ikuik, mairiang jo kudo bapalano, mambaok baka jo kudo baban. Umar malarang.
Manuruik warih nan dijawek. Sarupo dikisahkan guru guru, Khalifah Umar ko datang ka sinan, karano Sophronius mintak mancaliak jo mato kapalo, sia bana Umar Singo Padang Pasir Sang Penakluk nan sangek ditakuti musuah tu. Iyokoh sasuai tando tandonyo jo nan disabuik an dalam kitab kuno nan diyakini pimpinan Nasrani maso itu.
Sabab, dalam kitab nantun, dijalehan bana, suatu maso akan tibo Sahabat Muhammad namonyo Umar manakluak an Baitul Maqdis sacaro damai. Umar tu tibo baduo sajo jo pambantunyo, manunggang saikua unto, baganti ganti dari Madinah. Sudah tu kaki Umar bangkak bangkak. Tumiknyo pacah pacah, batih disalimuti abu padang pasir. Nan ka tigo, baju gamih Umar kain kasa. Usang. Tumboknyo tigo baleh.
Dari duo tando samulo, barasiah bana riwayat kitab kuno tu. Baduo bajalan manunggang saikua unto, ganti ganti mairik tali. Sudah tu bangkak pulo kaki Umar basalimuik abu padang pasir. Pas. Ndak maleset saangin juwo.
Tibo di tando nan ka tigo, kutiko dihituang tumbok baju Umar, nan nampak dek Sophronius cuma duo baleh. "Wahai Amirul Mukminin. Dalam kitab kami tumbok baju engkau ko tigo baleh buah. Ba a kok nan kami hituang cuma duo baleh?".
"Iko ciek lai ha," jawek Umar sambia maangkek katiak sabalah suok.
Sakutiko itu Sophronius, sarato kasadonyo urang gadang di Yerusalem nan hadir mamakai baju kabasaran mewah mewah, maretek, marukuak taruih sujuk ka Umar.
"Ijan sujuik pulo kalian ka ambo. Tagak an sajolah kapalo kalian tu. Aman sajo kalian sadonyo tingga, baibadah di kota ko. Nan paralu dek kami kalian ikuik aturan nan kami tatapkan," kecek Umar.
Urang urang gadang Yerusalem sadonyo maangguak takzim. "Ambo manyarahan kunci kota ko ka urang nan tapek. Ambo ndak manyasa. Patuik kironyo pamimpin nan randah hati sarupo Umar jadi panguaso kota suci," kecek Sophronius sambia balutuik, maunjuak an kotak kunci ka Umar bin Khatab.
Curito ko diulang baliak Mak Uniang dalam wirik mugarik, malam kapatang di surau baru.
Malanca mananyo, "Kini sia lai nan bisa manakluak an Baitul Maqdis baliak sarupo dulu tu, Mak?"
"Ado nantik masonyo, Nca. Kutiko umaik Islam ko, lah samo raminyo sumbayang subuah jo sumbayang Jumat. Karano tu kalau Malanca nio mambantu Palestina, rajin sajolah sumbayang jamaah," jawek Mak Uniang lunak.
Malanca tahanyak.....
