Ditulis Oleh : A.S Patimarajo
Mak Pono kamanakan Datuak Jangguik, mamuji Mak Inggih satenggih langik. Tasabuik dek Pono baso Mak Inggih tu elok bana, ikhlas bakarajo. Inyo datang ka parak, ka sawah, ka pasa manyapo. Inyo sumbayang bakaum pulo di musajik tangah koto.
"Pakaro masuak kampuang kalua kampuang, ambo yo banyak baguru ka baliau tu," puji Pono manulih di surek kaba. Sabananyo Pono tamasuak urang santiang juwo. Sabab baliau lah duo kali tapiliah jadi kapalo suku. Tapi, nampaknyo, kunfu Mak Inggih nan kini jadi kapalo nagari, labiah tenggih dari Pono.
Jikok dicaliak, ilemu nan dipakai Mak Inggih barasa dari niniak moyang Pono juwo. Tapi baliau maamakan sapanuah hati. Sarupo pakai baju putiah satiok payi bajalan. Langkok jo galak manih maadok i masalah. Marapek kalau dijarak. Maimbau jikok dilengah. Manuruik urang nan acuah. Kadok kadok silaturrahmi ka rumah lawan.
Kutiko dulu urang kampuang Pono mamancia an Mak Inggih, nan Mak Inggih antok sajo. Sungguah pun ba itu baliau cari aka. Akianyo dapek pangana. Bak kecek urang tuwo tuwo: takuik dek badia, larilah ka pangkanyo. Mako Mak Inggih acok datang ka kampuang Pono.
Tiok rirayo inyo tibo. Sadang bulan tarang inyo datang. Urang surek kaba baralek gadang di kampuang Pono, Mak Inggih hadia langkok jo kawan kawan. Baliau bawo buah tangan bakaranjang karanjang.
Inyo antakan rimih panembok jalan mamutuih ka kampuang sabalah. Baliau agiah pulo kamanakan Pono karatu ubek sakik. Balanjo sikola dapek pulo alakadar. Surek tanah tando miliak pribadi dibarikan.
Tapek bana kecek urang gaek saisuak: dek ameh kameh, dek padi jadi. Kain pandindiang miyang, ameh pandindiang malu. Pituah tu yo mangkuih bana dek Mak Inggih. Sahinggo babaliak awa panabangan. Tapesona Pono dek buah tangan. Sahinggo bataruih tarang baliau mangecek mamuji Mak Inggih.
Curito ko disampaian Mak Uniang di lapau simpang, sapulang sumbayang Isya dari musajik malam tadi.
Malanca langsuang manyolo, "Ruponyo, asa lah kanai siram, ndak ado karak nan kareh, yo Mak."
"Mak Pono tulus mamuji Mak Inggih tu mah Nca. Lah takah itu elok urang, apo lo ndak ka liau puji," baleh Mak Uniang.
"Mak Inggih tu pandeka gadang mah, Mak," kecek Malanca babisiak manjalang payi....
.jpeg)
