Ditulis Oleh: A.S Patimarajo
Latiah karajo sudah luhua, Malanca takulai di kurisi. Dalam hanok, rasonyo lah lamo ndak pulang. Makonyo Malanca ka kampuang sorang sajo. Saku padek. Oto bakilek. Salaku katua parantau, namo Malanca harum bana di masyarakat. Banyak nan dipabueknyo untuak mambangun nagari.
Dulu mambuek surau kaum. Sudah tu mamelok rumah masyarakat nan hampia goncoa. Tambah pulo madam tapi banda. Kudian mandata an tanah lapang main bola. Kini mamelok musajik. Tambah lo macor jalan dari pangka ka ateh puncak bukik, tambuak ka baliak untuak wisata.
Karano itu, urang kampuang mintak Malanca jadi niniak mamak, manyandang gala datuak. Nan gadang basa batuah. Kapayi tampek batanyo. Kapulang tampek babarito. Ibarat kayu gadang di tangah koto. Tampek balinduang jo basanda.
Banyak parubahan di kampuang barakat bantuan Malanca. Anak baliau pangku, kamanakan baliau bimbiang. Urang kampuang dipatenggangkan. Sainggo kini anak kamanakan lah maraso sanang.
Malanca sudah ko, ka mambukak sikola lapau. Lapau ko musti dibardayakan. Iko potensinyo gadang untuak kamajuan nagari. Lapau ko bisa manambah ilemu masyarakat. Siapo nan bisa mangusoi lapau jo surau, pasti barasil mamimpin. Ba itu kecek Malanca dalam hati, sambia bakaco bacamin diri.
Jikok paralu, kecek Malanca dalam hati, sado lapau di Minangkabau ko, diagiah internet gratis. Perai, tak mambayia. Sudah itu dibuek pulo grup baraja mato kuliah. Tiok anam bulan diagiah soal ujian. Cukuik ampek tahun dapek sartipikat es satu. Jikok ditambah duo taun dapek es duo. Kok namuah juwo manambah mandalami bisa es tigo.
Salain daripado itu, Malanca ka mausul supayo APBD duosangah parsen dipotoang untuak mambantu garin, guru mangaji, imam musajik, khatib sarato untuak operasional niniak mamak nan siang malam abih harinyo muuruih anak kamanakan.
Rumah gadang jo surau nan mumuak, dipelok supayo jadi kuat. Gunuang nan tigo dibuek an sartifikat ateh namo rakyat. "Ba a manuruik Mak Uniang. Kok coitu kito buek?" tanyo Malanca di musajik, sudah sumbayang bajamaah.
"Wa ang, curito tu, nan ka iyo iyo sajolah, Nca. Waden banyak kajo ah," jawek Mak Uniang sambia malucuih.
Malanca tasentak. Ruponyo baliau barasian takalo takulai di kurisi....
.jpeg)
