Ditulis Oleh : A.S Patimarajo
Pagi tadi sarupo biaso, sudah sumbayang subuah, sapulang dari musajik, Mak Uniang bacurito ka Malanca. Dulu, katonyo, Mak Uniang, bakunjuang ka Nagari Sambilan, Malaysia, sambia maanta kawan payi barubek.
Naiak oto dari Padang ka Dumai. Manyubarang jo kapa ka Malaka, tangah hari. Taraso nyaman, sanang, diambuih ambuih angin lawik. Tibo di Malaka kawan Mak Uniang, si Zulkifli, mamareso badan di rumah sakik. Sudah tu barisuaknyo payi ka Saremban, ibu kota Nagari Sambilan.
Di Nagari Sambilan ko lah tampeknyo urang Minangkabau, bamukim sajak dulu. Ado duo baleh suku anak kamanakan di sinan: Biduanda, Batu Hampar, Mungkal, Sri Lemak, Paya Kumboh, Tiga Nenek, Sri Melenggang, Batu Belang, Tanah Datar, Anak Acheh, Anak Melaka dan Tiga Batu.
Kutiko bakunjuang ka Istano Sari Mananti, Mak Uniang manunggu oto tumpangan di simpang jalan. Surang supir oto sedan mangatoan, ongkos ka sinan 20 ringgik. Jikok baduo sajo kanai masiang masiang 10 ringgik.Tapi kok amuah manunggu panumpang duo urang lai, ongkos cuma 5 ringgik surang.
Pado lamo manunggu, Mak Uniang mambayia sajo 20 ringgik baduo jo kawan tadi. Supir ko mangecek jo baso Minang. Katonyo niniak muyangnyo dari Maninjau. Lah duo kali inyo mangunjungi tanah leluhur. "Samanjak ayah maningga, kami ndak ado pulang ka Sumatera lai Mak," katonyo.
Kalau di Malaysia, Negeri Sembilan tu namonyo Minangkabau. Jadi kok di tarminal bus Malaka, awak tanyo oto ka Saremban. Agen kadang manunjuak an oto sambia manyabuik ka Minangkabau. Sabab, urang Negeri Sembilan adat istiadatnyo yo Minangkabau bana. Hanyo namo sukunyo sajo beda jo Minangkabau Indonesia.
Kecek Mak Uniang, dulu ado panaliti dari Japang, namonyo Kato Tsuyoshi mancubo ituang jumlah suku di Minangkabau Indonesia. Keceknyo ado 96 suku. Sapuluah suku nan rami di Minangkabau Indonesia tu adolah: Chaniago, Melayu, Piliang, Tanjuang, Koto, Jambak, Sikumbang, Mandahiling, Pitopang jo Guci.
"Jadi waang kok ka mancaleg juwo, musim ka tibo, ancak waang tamui urang nan sasuku jo waang dulu. Baiyo ba tido awak badunsanak. Pado suaro lapeh ka urang, ancaklah kuah tatunggang ka nasi. Nasi ka dimakan juwo," jaleh Mak Uniang.
"Taruih sajolah, curito Malaysia tadi tu Mak. Waden ndak ka mancaleg bagai doh," pinteh Malanca.
"Yo, Nca. Agak tanang di Nagari Sambilan. Patuiklah dulu babondoang bondoang dunsanak kito marantau ka sinan," kecek Mak Uniang takah yobana.
"Bara lamo Mak Uniang tingga di sinan?" tanyo Malanca.
"Ndak sampai sahari doh Nca. Kami lalok di Kualalumpur," jawek Mak Uniang singkek.
"Dimaa Mak Uniang tahu, baso tanang di sinan pado di siko? Mak Uniang cuma sangah hari di sinan," salidiak Malanca.
"Nyo nan lamak tu, alun dimakan lah taraso mah," jawek Mak Uniang mulai kareh.
Malanca hanok sajo lai. Banyak tanyo, beko disabuik lo dek Mak Uniang antene randah. Ndak manangkok....
.jpeg)
.jpeg)