Ditulis Oleh : A.S Patimarajo
Mak Atia, nan lah baumua 92 tahun, kapatang ko, tapiliah baliak jadi Datuak Palo kampuang sabalah. Sabananyo gaek ko, lah pansiun. Tapi mancaliak nagarinyo lah diusai dek mukaluak nagari Sipiciang, Mak Atia ndak sanang hati.
"Manga juwo gaek maju lai. Ancak duduak duak sajo gaek di rumah," saran cucu Mak Atia.
"Ibo hati waden, kampuang kito lah dijua dek urang nan bakuaso. Payah kalian isuak mambayia utang," jawek Mak Atia jo mato balinang.
Dalam catatan Mak Atia, nan tajadi sadang bak kini, urang Sipiciang, manyiram pitih takah hujan labek ka nagarinyo. Ndak tangguang tangguang, macam macam nan dibuek Sipiciang. Ado rumah, ado jambatan, ado jalan, ado pasa. Sadonyo tu hutang.
"Sipiciang datang ka kampuang awak mambali tanah. Mambuek sawah. Manambang ameh. Manambah piutang. Ndak ado untuangnyo dek awak. Inyo iduik mewah. Awak manonton sajo mancagun," kecek Mak Atia.
Jikok di caliak, urang Sipiciang tu, yo kayo kayo. Inyo pandai mangaleh. Sadonyo digalehannyo asa dagang layi bauntuang. Sipiciang bausaho di kampuang urang, inyo baok anak kamanakan karajo. Diagiah gaji gadang. Samantaro urang tampatan hanyo untuak tukang catat jo panjago kaamanan. Iko bana mambuek paruk Mak Atia marumeh.
Tadanga pulo kaba dek Mak Atia, urang Sipiciang tu, tibo bagalombang galombang. Sudah tu inyo diagiah kasampatan dek panguaso punyo rumah tampek tingga. Kasado rumah nan dibuek Sipiciang, hanyo untuak anak kamanakannyo sajo. Urang tampatan ndak bisa mambali karano maha.
"Iko karajo gilo ko mah. Ndak bisa takah iko. Nan kalamak dek inyo sajo. Inyo mambuek umah, awak punyo utang. sudah tu kamanakannyo pulo nan tingga di sinan. Panguaso dalang. Ganti paja tu!" bantak Mak Atia manyentak hati masyatakat.
Sajak itu masyarakat lah batekad, Mak Atia musti diduduak baliak jadi Kapalo Nagari. Sabab, kok dipadia sajo panguaso kini bakuaso, bisa manompang panduduak asli ka urang pandatang. Alah limau dek binalu.
Mak Najib lawan Mak Atia, mulai galisah sajak Mak Atia tagak di subarang. Payah Mak Najib maagiah kode, Mak Atia basilingah. Dibujuak dirayu rayu dek Mak Najib. Tapi Mak Atia tatap ndak amuah.
"Biya waden bakawan jo Nuar daripado jo Najib. Dulu Nuar tu waden tampeleang. Tapi kini waden sapakat jo inyo. Kami samo samo malawan Sipiciang," kecek Mak Atia ka urang surek kaba.
Padohal dulu, Mak Atia nan manggadangan Najib. Sahinggo Najib bakuaso di nagari. Tapi nampaknyo Najib ndak bisa mailak dari kompolot Sipiciang. Makonyo Mak Atia berang.
Curito ko disampaian Mak Uniang ka Malanca sudah sumbayang subuah pagi tadi. Malanca batanyo, "Urang Sipiciang tu apo sukunyo, Mak?"
"Kabanyakan ndak basuku, Nca. Urang makan masak matah. Itu mambuek, Mak Atia maloyo," jawek Mak Uniang.
"Jaleh ndak basuku, manga Mak Najib amuah lo bakawan jo inyo, Mak?"
"Dek Sipiciang, karateh bilih ko ndak baseri doh, Nca. Samantaro bini Najib panggaya," jawek Mak Uniang.
Malanca tamanuang....
.jpeg)
