Ditulis Oleh : A.S Patimarajo
Suatu kali, nampak siaran dalam tipi, anak silek bajaya dapek ameh. Ungku Palo sanang hati ndak tabado. Baitu juwo Amai Upiak sarato sa isi anak nagari.
Samulo dikiro hanyo dapek nomor sapuluah. Kironyo batuah sarawa galemboang di nan rami. Paretongan tapek, nagari taangkek ka nomor ampek.
"Iko lah buah karajo kareh kito basamo. Hasia basungguah sungguah. Manjadda wajjadda. Sia nan sungguah sungguah pasti mandapek," kecek Ungku Palo ka Amai Upiak nan duduak di sabalah.
Amai nan induak samang Ungku Palo tu, maangguak barek mandanga buah tutua anak asuahnyo. "Kok nan ka layi, cik kudo jadi godok. Kok nan ka indak, sarawa panjang jadi sarawa kotok," bisiak Amai samo surang.
Sabab, mangko itu tapikia dek Amai, karano guru gadang anak anak nan dapek ameh tu, lawan barek dek Ungku Palo untuak musim ka tibo.
Sudah Ungku Palo bapaguik paguik jo guru gadang silek. Amai sanyum bagumam manahan raso. Banyak tapasia di rawuik baliau. Hanyo baliau surang nan tahu apo arati sanyum satangah cangkia.
Anak padusi Amai nan taruih ikuik ka maa amaknyo payi, alun mangarati juwo tantang silek di sanyum Amai nan lah bapaham tinggi.
Samantaro itu, kutiko mancaliak takah jo tokoh guru gadang silek tadi, takana dek Mak Uniang samaso mudo baraja langkah ampek.
Kecek guru Mak Uniang maso itu, silek awak ko ndak basinggungan doh. Tapi urang mancaliak tahu nan manang, jaleh nan kalah.
Pado lahianyo tagak bajaraan, di dalam batin bakuampeh. Kalau lawan marantang kida, ingek ingek tangan nan suok bamukasuik. Tagak tagak itiak kawan tu, digantuangnyo kaki sabalah, usah tagak alih di muaronyo, badantang pusek kanai tumik. Tapi agiahkan sandiang badan, umpan jo tapak tangan, mako urang bapikia mamasuak i.
Kajadi ilemu di langkah ampek. Ka suwok mancari aka, ka kida manjago jarak, ka balakang manyerak umpan, ka muko langkah mamutuih. Aratinyo: sakali urang basalah bakeh awak, baleh jo galak manih. Duo kali urang maulang salah bakeh awak, jawek jo kurenah. Tigo kali inyo ulang kasalahan ka awak, bari raso jo kabanaran. Ampek kali urang tu maulang salah juwo bakeh awak, baru diambiak kaputusan.
Jikok iko lah tajadi, mako bawo duduak maranuang, bapikia dalan dalam. Dikaji sagalo asa, ditimbang sagalo raso. Kasudahanyo, bilo supadan dianjak urang, bana bak cando ditukari, mako tunjuak kan baso awak laki laki. Salangkah usah kito suruik, sapatah usah kito baralah, kok nyawo kan samo dapek malam. Ba itu pituah dari guru.
Kutiko mamutuih kaji, guru juwo bapasan: ijan lupo maikuik suruah, maantian tagah. Sarulah urang taat kapado Allah. Ijan disisik padi jo lalang.
"Ingek, anak Minang nan pandai silek ko, tasabuik pandeka. Aratinyo pandai aka. Pandai manyalasaikan nan kusuik, bisa manjaniahan nan karuah," itu bana pasan dari guru.
Kutiko carito ko diulang Mak Uniang ka Malanca sudah sumbayang subuah pagi tadi, Malanca batanyo, "Silek awak ko kan ndak bisa dibawok batandiang doh, Mak?"
"Yo, Nca. Niniak muyang kito dulu maaja silek malam hari. Aratinyo ndak paralu urang tahu baso awak pandai basilek," jawek Mak Uniang data.
"Kok bantuak itu, untuak apo guno baraja silek? Tak bisa dibawok batandiang. Bilo ka bisa dapek madali ameh!" panciang Malanca.
"Kalau urang Minang nan pandai langkah ampek, Nca. Indak madali nan dapek doh. Inyo tu bana jadi ameh," baleh Mak Uniang jo kato bayang.
"Kok Amai Upiak tu, apo sileknyo tu, Mak," tanyo Malanca maaliah kecek.
Mak Uniang takuik manjawek. Hanyo babisiak ka Malanca. Malanca tangango mandanga...
.jpeg)
