Ditulis Oleh: A.S Patimarajo
Tasabuik dalam carito lamo, Lalek Tuwo jo Silangkaneh urang nan pandai mambuek duto. Kaduo urang ko kakak baradiak. Karajonyo sibuk mampatutuakan Rajo Mudo. Mulai dari pagi sampai pagi barisuak, bakatutuih kaba baliau karang. Nagari buncah, mandanga muncuang tak bakaruncingan.
Takalo tangah hari disabuiknyo Rajo Mudo kanai sakik canggu. Badannyo mambusuak. Sahinggo urang tak namuah mandakek, baun ulek. Kutiko malam tibo dikatokannyo, Rajo Mudo maidok tukak tekoang. Sabalah kaki busuak arang, istano langang tak baurang.
Mulai duha masuak, disampaiannyo ka urang rami dari balai ka balai, baso Rajo Mudo lah sedeang. Galak galak surang, duduak di janjang maetoang jari. Kalau wakatu isya masuak, dilapehnyo tubo di lapau lapau, rajo kanai sijundai. Manjek manjek dindiang, bakatai katai dalam biliak.
Singkeknyo, tak ado nan elok tantang Rajo Mudo. Buruak taruih di lidah Lalek Tuwo jo Langkaneh.
Jikok dihituang, ado duopuluah ampek hikayat buruak rajo, dikarang kakak baradiak tu tiok hari. Salusian kakak, salusin pulo adiak. Jadi samo banyak mambuek kecek. Takah tu bana Silangkaneh jo Lalek Tuwo, bakasumat malapeh kasam siang malam ka Rajo Mudo.
Tak ado karajo lain, dek nan baduo ko. Urang mangaso inyo mahayal. Urang bakaruah inyo manarawang. Abih hari harinyo mamuta pangana mancari sumbang Tuan Rajo. Maso itu, Silangkaneh jo Lalek Tuwo lah kuruih bukan tak makan. Tapi karano bapikia kareh kurang lalok.
Kadang ado umat nan heran, ba a sarupo itu bana jajok mareka ka Rajo Mudo. Namuah tak ka parak ulah mambuek sasek. Biya tak ka sawah asa siasek layi sudah. Manggaleh indak batani tidak. Tapi dapua barasok taruih. Dimaa inyo dapek kepeang? Antah!!.
Tipak nan dari Rajo Mudo, ndak ado nan barubah. Baliau tak maraso rugi. Karajaan taruih diuruih. Badannyo tatap gapuak gampa. Makannyo batambuah, laloknyo bakaruah, buang aianyo lasuah.
Baliau tatap manarimo tamu jo hati lapang jo muko tanang. Tak hanyo itu, satiok nan tibo ka istano, taruih pulang mambawo buah tangan.
Sakali wukatu, tibo hasuik ka Rajo Mudo, manyuruah tangkok Silangkaneh jo Lalek Tuwo. "Garebek sajo kaduwo urang kurang aja tu, Tuanku. Kami tahu di maa inyo bakaliaran siang malam," usua surang dubalang.
"Biya sajolah mareka tu. Ibo wak!" jawek Rajo Mudo jo sanyum manih, sambia manyilahan dubalang makan pinukuik jo susu kambiang.
"Atau kami sudahi sajo paja kalera tu, Tuanku!!" garetak dubalang nan lain.
"Ijan lai, ibo wak!" jawek Rajo Mudo sambia maaliah kecek.
Kutiko carito ko diulang Mak Uniang ka Malanca sudah sumbayang subuah pagi tadi, Malanca batanyo, "Ba a lo Rajo Mudo tu, lamah bana, Mak. Taruih manjawek jo kato ibo sajo. Lah takah itu jaek urang ka baliau?"
"Nyo, co iko mah, Nca. Kalau jadi rajo tu, awak musti banyak raso," jawek Mak Uniang sambia masang tarompa kalua musajik.
"Raso apo, taradok Langkaneh jo Lalek Tuwo tu, Mak?" salidiak Malanca.
"Raso ibo, Nca. Ibo jikok diambek inyo bacaracau. Ndak barasok tungku di rumahnyo beko," jawek Mak Uniang sambia takaja pulang.
"Lamak lo tu, Mak. Manarimo ampau mamburuak an urang. Sia nan maupah, Mak?" hariak Malanca di jalan langang.
Mak Uniang lah hilang....
.jpeg)
.jpeg)
