Ditulis Oleh : A.S Patimarajo
Maso dulu tu dalam curito lamo, tasabuik Mak Inggih jadi Angku Palo didukuang rakyat badarai. Samaso itu pulo banyak kajadian nan ganjia ganjia dalam nagari. Salain Pangulu, Manti, Mualim jo Dubalang, ado pulo kalompok urang sarupo angkatan ka limo. Namonyo banserap.
Banserap ko baraja barih ba barih. Baraja hormat angkek tangan. Baraja angkek sanjato. Baraja bakemah tapi rimbo. Antah dimaa inyo dapek kepeang, sahinggo urang urang ko, punyo pulo baju saragam langkok sipatu jo kupiah bagai. Tambah cando diliek urang, mareka tu, ndak malu makai tando pangkek jo tando jaso.
Angkatan banserap iko, katonyo, mati matian manjago kampuang halaman. Inyo maraso urang usali dalan nagari. Dek karano inyo nagari ko tagak. Kok tak dek inyo, tak ado nagari ko. Pokoknyo ndak ado lai urang lain di ateh awak. Tapi jikok disuruah bana payi parang malawan anak asuah panjajah, inyo anggan.
Nan mahia dek urang urang ko, hanyo manggaretak anak anak surau nan suko bakumpua kumpua payi mangaji. Takah baruak takabek tapi jalan, banserap ko taruih mancameeh anak anak siak lalu payi baguru. Tapi kok ado urang lain nan payi bajoget ka galanggang, inyo sato sanyum sanyum mandukuang. Takah marentak tali, manuruik mintak payi.
Dalam curito lamo tu, urang urang ko mangaku pandukuang satia Mak Inggih. Samantaro Mak Inggih payah pulo manenggang parangai banserap tu. Kok ka dilinduangan, beko dicaliak rakyat awak ndak adia. Jikok ndak ka dilinduangi awak maraso paralu pulo jo inyo. Ka ba a lai?
Karano itu, Mak Inggih antok antok sajo taradok tingkah laku banserap ko. Icak icak ndak tahu. Dipabiya sajo inyo babuek sakandak hati. Kok ka babarih, babarih lah. Kok kapakai saragam, pakailah. Kok ka baraja parang parangan, barajalah. Pokoknyo asa lai ndak mangaduah ka Mak Inggih, dipalapeh sajo sagalo kandaknyo.
Sakali wakatu induak samang banserap, Pandeka Paik Mukia Sarap, mangecek di muko urang bangso sipiciang. Kecek baliau, nagari ko ado dek karano niniak muyang sipiciang. Kok tak ditoloang sipiciang alun tantu nagari ko ado, katonyo.
Samantaro anak anak surau tahu bana, baso sajak dari niniak muyangnyo, bangso sipiciang ko taruih mancari kauntungan, salamo tingga di nagari tampek inyo malakok.
Siapo sajo nan jadi rajo di nagari tu, kaum sipiciang pandai marapek mintak kalindungan. Karajonyo sajak dulu maumbuak umbuak angku palo, supayo nagari bisa dikuasoinyo.
Bedo pandapek iko mambuek banserap jo anak surau bakalawanan. Dek bangso sipiciang iko bana inyo paliaro, supayo aman taruih mangureh isi nagari.
Kutiko carito ko diulang baliak dek Mak Uniang ka Malanca sudah sumbayang subuah pagi tadi, Malanca tangango. Dalam hati Malanca bakato, lah dipamainan sajo anak nagari dalam carito ko, dek bangso sipiciang.
Sipiciang lah galia sajak dulu.....
.jpeg)
