Notification

×

Iklan

Iklan

Kipeh Sate

22 Desember 2018 | 16.09 WIB Last Updated 2018-12-22T09:09:58Z

Ditulis Oleh : A.S Patimarajo



Dulu maso bagolak, carito urang kampuang hanyo Datuak Kayo jo Mak Inggih sajo. Kaduo urang ko jadi buah bibia dari lapau ka lapau. Jadi buah tutua di tapian mandi. Jadi caramah dalam majilih. Apa sae ota dimuloi, tatap bakasudahan antaro Datuak Kayo  jo Mak Inggih.

Datuak Kayo tasabuik urang bapitih. Badan gampa kapalo tagak. Langkah tagok manyalasai. Apak jo mande urang barado. Mintuwo urang bakuaso. Mako batambah tamusawua Datuak Kayo, sampai jadi katua  dubalang dalam nagari.

Sambia ilia mudiak mauruih barih babarih, baliau pandai buek usaho. Kambiang  sikua jadi duo. Lamo lambek bakanbang jadi kudo. Untuak taranak kudo tu, baliau bali  ladang bamintalak, sawah batumpak tumpak. Sampai bukik gadang sajauah mato mamandang. 

Samantaro Mak Inggih hanyo urang biaso. Apak mandeh tak barado. Tingga  di tapi kampuang. Amak rumah tanggo, ayah  tukang kayu. Sajak ketek, Mak Inggih baraja mambuek parabot. Mulai dari lemari sampai karando kaco. 

Sambia baraja mauruih kadai, Mak Inggih sato pulo bakumpua jo kawan kawan di lapak bantiang bagak. Karano mamikia lai maampek, manangkok bana siaran atene. Tarago manyimak inyo basiasek, sampai juwo Inggih jadi katua di galanggang.

Papatah lamo mangatokan: kok payi anak ka lapau, iyu bali balanak bali, daun kacang ambiak di hulu. Jikok payi awak marantau, ibu cari bapak pun cari, induak samang cari dahulu. Pituah iko pulo akianyo mambawo Mak Inggih bainduak samang ka Etek Baya mauruih kalompok bandera bantiang bagak tingkek bawah. 

Takalo mulai marangkak bahusaho mambuek tarali, Mak Inggih dapek kawan urang santiang. Sajak bainduak samang ka Etek Baya, Mak Inggih duduak jadi kapalo suku.

Baya nan bakulindan jo Sipiciang, mambuek Mak Inggih tagak tali. Sadang manjadi kapalo suku, baliau tapiliah jadi kapali kampuang. Tak lamo sudah tu tapiliah pulo jadi kapalo nagari. Iko nan mambuek Datuak Gamuak tapurangah. 

Hampia cukuik sajamang jadi kapalo nagari, Datuak Kayo baliak malawan Mak Inggih untuak kaduo kali. Dek iko pulo makonyo, urang kampuang sibuk mamikia nan maa di antaro nan baduo ko ka di piliah. 

Kok dipiliah Mak Inggih, raso kalamak pulo dipimpin Datuak Kayo. Kok ka dipiliah Datuak Kayo raso kalamak jo Mak Inggih sajamang lai. Tapi nan labiah sadiah di baliak itu, asuang pitanah jo kipeh sate bajadi bana dalam nagari.

Antaro Mak Inggih jo Datuak Kayo nampak biaso biaso sajo jikok basuo. Kok paisok siriah manyiriah, kok ka makan imbau maimbau. Tapi nan urang di bawah angek pulo tadah pado galeh. Amuah ndak basapoan, baradu sirah mungko. Ba itu bana angek susana.

Kutiko carito ko disampaian Mak Uniang ka Malanca sudah sumbayang subuah pagi tadi, Malanca batanyo, "Kipeh sate tu apo tu, Mak."

"Kipeh sate tu, Api nyo ketek, asoknyo nan labiah," jawek Mak Uniang.

"Baunnyo ba a, Mak?"

"Baunnyo ndak dapek agak, Nca. Taraso lapa awak sudah makan," jawek Mak Uniang sambia jalan malucuih.

Malanca  tamanuang mambayangan tukang kipeh...
×
Kaba Nan Baru Update