Ditulis Oleh : A.S Patimarajo
Suatu kali dulu maso bagolak. Ungku Malin bacurito tantang karajaan dalam rimbo. Sajak zaman taun katumba, nan jadi rajo di hutan tu kaum singo. Sakali musim rajo ko dipiliah basamo samo jo suaro tabanyak. Mako tapiliah lah musang jadi rajo.
Musang ko jaleh ndak bakaruncingan. Inyo mangecek lah bak kato inyo sajo. Lain pagi, lain pulo siang. Lain kapatang lain lo kini. Masak siang matah sanjo. Masak malam matah pagi. Nan apa bana dek inyo cuma ayam. Pakaro minyak samba naiak, musang ndak mau tahu.
Sahinggo muaklah isi rimbo. Mulai dari kancia, cigak, kandiak, baruak sarato wawau bagai. Kasado binatang ko bamufakat, mintak singo baliak, manggantian musang jadi rajo.
"Tapi aturan kini suaro tabanyak. Kaum waden saketeknyo. Ba a pulo bisa waden tapiliah jadi rajo," jawek singo.
"Aman tu, Mak Singo. Beko kami mintak suaro rangik mamiliah Mamak. Rangik ko yo keteknyo, tapi suaronyo banyak," baleh kancia pimpinan rombongan, takah yobana.
Sudah tu kancia payi mambujuak rangik. Kancia manjamin, jikok singo tapiliah, rangik bebas masuak kampuang kalua kampuang, maisok darah mukhaluak rimbo.
Sudah ditekan itam ateh putiah. Rangik nan banyak tu, disuruah maharu haru dalam kampuang, manggigik mukaluak rimbo. Tajadilah musim gigik rangik. Banyak anak anak masuak rumah sakik. Tamasuak anak bini musang dirawat.
Karano kampuang rimbo, lah ndak aman, akianyo kancia mambuek pangumuman, baso rajo musti dituka. Sudah tu, diadoan pamilihan ulang. Akianyo tapiliah baliak singo jadi rajo.
Kutiko singo mamarintah, sakik gigik rangik hilang. Nagari aman, harago minyak samba turun. Makanan banyak. Makmur. Panduduak bariang hati, bamusim musim.
Tipak kapado rangik, lamo bana puaso, akianyo baliau basamo samo mintak izin ka singo manyari makan. Mako mulai lah rangik masuak kampuang maisok darah. Hari hari mangigik, sampai bapakan, babulan, batahun maisok darah, akianyo panduduak rimbo sakik damam. Masuak rumah sakik babondoang bondoang.
Panduduak mandasak singo supayo manyamprot rangik. Sudah musyawarah jo kancia, akianyo singo manyari racun pambunuah rangik. Dek racun mulai ditembak an, banyak rangik tumbang mati tacilantang.
Rangik protes ka singo. Dulu ado pajanjian, itam di ateh putiah, "Tapi kami ka diagiah kabebasan manyari makan. Kini ko kami lah basamprot jo racun. Ba a sabananyo ko?" tanyo rangik ka singo.
"Biya sajolah sakali tu, Ngik. Sudah ko waden samprot kalian jo racun palasu. Kok kanai bana dek aia matah tu, icak icak jangkang sajo kalian. Tapi ijan kalian sosoh bana maisok darah tu," jawek singo sarupo nan ditunjuak dek kancia.
Akianyo samo samo paham sajo lai. Rangik maisok juwo. Samprot aia matah jalan juwo. Nan kancia aman di istana makan mantimun.
Kutiko curito ko diulang baliak dek Mak Uniang ka Malanca sudah sumbayang subuah pagi tadi, Malanca batanyo, "Apo pangkek kancia tu, Mak. Lamak na nyo makan makan mantimun di istana?"
"Ndak ado lo ditarangan dek Ungku Malin wukatu bacarito dulu tu, Nca," jawek Mak Uniang.
Sambia tasanyum, Malanca bapikia, mungkin kancia ko kalompok ahli mah....
.jpg)
