Barasian

Ditulis Oleh : A.S Patimarajo

Anak mudo tu mairiangan Mak Uniang sajak dari musajik sampai  jalan ka rumah, sudah sumbayang isya malam ka patang. Inyo bacarito nan tajadi di lapau simpang akia akia ko. Mako inyo bakaba, karano Mak Uniang lah jarang duduak di lapau. 

Kato anak mudo tu panjang leba, kini hari ka hari di lapau simpang, kecek ndak labiah dari  kisah Mak Inggih jo Datuak Kayo. Amuah batagang urek mariah,  urang  managak an kabanaran tuanyo surang surang. Samantaro tuanyo tu antah lai tantu jo inyo antah indak. Nan inyo lah maraso badunsanak kamba jo tuan nyo tu.

Antah cadiak antah binguang. Antahlah. Tagak pulo mantagi kutiko tuanyo disanjuang sanjuang. Manih galaknyo bilo tuannyo di puji puji. Mambusuang dadonyo bilo tuannyo disabuik elok. Sabaliaknyo, amuah inyo basirah muko jikok tuanyo digitik dipiciak jo etongan. Tabik suganyo kutiko dikecek an tuanyo ele, tele, kurang aka.

Kadang yo kaget, eh eran pulo wak dek inyo. Baru tibo dimeja lapak, mukasuiknyo meja lapau, langsuang sajo mangecek tuannyo santiang. Alun talakik urang manjawek, dituduahnyo tuan urang lain ndak salasai. Apo pulo urusannyo tantang tuan urang lain tu?

Iko lo ciek lai. Dulu inyo mangecek nan dicaliak kajadi tuntunan tu ado tigo: takah, tokoh, tageh. Kudian lah barubah sajo:  tengak, tenggen, tagelek. 

Lah jaleh dalam agamo disabuik an tando tando urang munapiak tu ado tigo: bajanji mukia, bakato duto, dipicayo kianat. Lah tarang pulo dikecek an ungku ungku di surau, jadi panutan tu ampek nan musti dipakai: sidiak, tabalia, amanah, fatanah. 

Sidiak tu aratinyo bana. Tabalia tu manyampaian kabanaran. Caro manyampaian kababaran ko ado lo tigo: logika, etika, estetika. Logika ko nan iyo iyo. Nan indak, indak. Etika ko mancaliak kutiko bilo wakatu nan tapek manyapan kabanaran tu. Sudah tu estetika, iko ba a seni awak manyampaiannyo. Ijan sumbarang osok sajo.

Amanah tu kaparcayaan,  bisa dipicayo awak handaknyo dek urang jikok kajadi panutan tu. Kalau fatanah tu aratinyo caradiak. Ba a nan caradiak, bisa mamaliaro agamo jo harato. Agamo dipaliharo supayo ijan tingga. Harato dipaliharo supayo indak mubazia. 

Kini amuah wak duduak baabih hari, manggunjiang. Mamburuak buruak an urang. Lah wak kecek an ka ano, Tapi ano karengkang. Maleh wak jo ano tu. Wak tutuik hape wak lai. 

"Lah ka kiamat nagari komah. Biyalah wak di surau sajo lai, Mak Uniang. Wak ndak sato sato lai doh," kecek anak mudo tu.

"Kamanakan di maa tingga? Eh namo kamakan sia garan? Lupo ambo?" tanyo Mak Uniang.

"Wak kawan Malanca, Mak. Mak Uniang tanyo sajo wak ka Malanca inyo tahu tu," jawek anak mudo tu, sambia salamualakum di nan kalam.

Mak Uniang tacangang, siakolah anak mudo ko. Sakali ko basuo baru. Kaditanyo ka Malanca,  lah sapakan ndak sobok. Kamaa kolah Malanca. Atau payi ka Jawa? kecek Mak Uniang dalam hati.

Raso mangecek lun sudah. Nan paja tadi la lanyok. Mak Uniang resek resek tapi kain. Baru inyo sadar baliau barasian....