 |
| Ditulis oleh : AS Patimarajo |
Pasbana.com --- Dulu maso bagolak, tukang hituang sacaro acak sabalun urang ka mamiliah, itu ndak ado. Nan galik wukatu tu, tukang mancalon marosok tapi kain, mangiro dalam hati. Bara kiro kiro suaro ka dapek.
Ciek layi, nan laku kutiko tu, pisuruah batanyo ka urang pandai. Dicaliak rupo jo limau puruik, dirandam aia tujuah muaro, tabayang rono dalam pinggan. Nampak tando induak samang disuko urang atau indak.
Pandapek urang pandai ko musti didanga. Salah salah ndak yakin, abih umpan dalam aia.
Pado suatu kali, pisuruah Inggih bakunjuang ka urang pandai, mintak pandapek untuak maju jadi kapalo kampuang. Manjaweklah urang pandai, baso Mak Inggih ka manang dalam lomba. Tapi inyo musti badampiang jo urang nan pangalaman.
Pitunjuak ko dituruik dek Mak Inggih, mako sampailah baliau duduak di kurisi puta. Salasai biduak ka subarang. Tasanyum Inggih maso itu. Sanang hati bakuliliang. Namo Inggih malayok ka tambun jantan ka kasiak bulan.
Anak nagari manyambuik badendang girang. Nan dinanti alah datang. Itu nan tajadi musim kapatang.
Kudian hari bajalan juwo. Tahun batuka bulan baganti. Lamo lambek manampuah labuah gadang, agak tadayuak jalan bendi. Bak kato urang tuo: sio sio utang tumbuah, takasia nagari kalah. Disangko ndak ka manga, nan jinak mamutuih tali.
Tasabab utang ndak kujuang lansai, bajanji acok mungkia, urang dilawan jo gadele, akianyo makin amba tabu ka ujuang. Karano lah masam taraso limau manih. Raso dibaok naiak, pareso dibawo turun. Anak nagari mulai mahituang dalam angan.
Rancana Inggih baulang baliak jadi Ungku Palo, barubah pandapek urang pandai. Kabek lungga, pasangan guyah, di muko jaleh kaliatan. Pisuruah Inggih takajuik, mandanga urang pandai mangecek, kini lawan agak barek.
Walau dikocok karateh baru, main balanjuik mandan digeser, nan taruah gadang juwo. Raso bakucak dalam hati.
Tapi karano banda sadang di awak, batambah juwo pasangan tapi. Ruponyo urang sabalik mandatiak lantai, karateh di tangan baragam juwo, pisuruah Inggih ilang aka.
Jikok dibuek bana sudi siasek, asak iko aliah itu, cakau iko, randam itu. Sadonyo hanyo pacama. Indak manambah tagok. Malah makin lapang pasak di tonggak.
Dikakok diajan tuah, urang di balai basilengah. Karateh turun taimpuk taruih. Batu lawan makin kareh. Awak kiyu, urang masak. Ka ba a lai, balak anam takapik di tangan. Pisuruah Inggih makin leno.
Kutiko curito ko dikisahkan Mak Uniang ka Malanca pulang sumbayang subuah pagi tadi, Malanca batanyo, "Ba a kok pisuruah Mak Inggih nan cameh. Samantaro Mak Inggih takah tanang sajo?"
"Pisuruah tu sadang talamak duduak di kasua taba," jawek Mak Uniang sambia minyimpang jalan ka rumah.
Malanca mangecek dalam hati. Jikok batuka juru mudi, tantu koki masak baganti pulo. Mukin dek itu pisuruah kalusuak panja...
.jpg)
