Kurisi

Oleh : AS Patimarajo

Pasbana.com -- Kilek baliuang lah ka kaki. Kilek camin lah ka muko. Nan lahia manunjuak an nan batin. Malu ndak dapek disuruak an. Arang jikok tacoreang di kaniang, tak dapek mailak layi. Alamat kalam kuluala. Karano tu iduik ko ijan biaso baduto.

Itu pituah Ungku Malin maso sudah bagolak ka murik murik baliau. Kecek Ungku Malin, barang sasuatu jikok lah dimulai jo duto, sampai akianya babuah cilako. Karano itu baliau mintak dalam iduik,  kito bajujur jujur sajo.

Takana kisah Namrut nan dinobatkan jadi rajo dek amaknyo. Sabananyo, kecek Ungku Malin, dulu nan kajadi rajo tu indak Namrut doh. Ado nan labiah barhak. Tapi karano Mande Namrut bokonsi jo urang lain, inyo buek duto supayo kurisi rajo dapek untuak anaknyo.

Ba itu juwo Firaun, kecek Ungku Malin, Firaun ko indak anak rajo bagai doh. Inyo cuma tukang sabik rumpuk kudo. Tapi dek ratak tangan elok, dapek jadi anak angkek rajo. Rajo mati dibunuahnyo. Inyo mangaku anak kanduang rajo, inyo nobatkan dirinyo jadi rajo.

Kaduo rajo niayo ko matinyo hino. Namrut mati busuak, banaknyo abih digigik ulek. Firaun mati tacabua dalam lawik, muncuangnyo sakah tasumbek lumuik. Sudahlah hino masuak narako pulo.

Ba a mako dihinokan Allah?  Karano  mareka ko maambiak pangkek  jo caro marampeh. Caro buruak ko jaleh manutuik hidayah dari Allah Ta'ala.

Tambah Ungku Malin, jikok awak ambiak sasuatu jo caro haram, mako rasaki nan maikuik sasudahnyo haram juwo. Kalau lah tamakan barang haram, alamat badan masuak narako.

Ungku Malin mauraian, ado babarapo sipat jubilih nan indak buliah dipakai dalam iduik ko, yaitunyo antaro lain: kizib aratinyo panduto, kutiman aratinyo panyambunyikan nan hak, kianat aratinyo pambinasokan, baladu aratinyo bodoh.

Sabaliaknyo ado pulo sipat malaikat  nan tasambunyi dalam badan, antaronyo: siddik aratinyo bana,  tablig aratinyo manyampaian nan hak, amanah aratinyo kaparcayaan, fatanah aratinyo caradiak pandai.

Jiko tasuo dalam iduik duo urang kawan nan basifat takah iko, mako kito musti maikuik kawan nan punyo sifat baiak. 

Supayo kito tamasuak golongan urang baiak baiak. Basamo samo kito masuak sarugo. Ba itu Ungku Malin manutuik kisah ka anak murik baliau.

Kutiko carito ko diulang Mak Uniang ka Malanca sudah sumbayang subuah pagi tadi, Malanca batanyo, "Ba a kalau  sipat buruak jo sipat elok basabuah dalan hati awak, Mak?"

"Kok itu nan tajadi, mako urang ko tamasuak kalompok buruak."

"Ba a mangko baitu, Mak?"

"Sabab, minyak tak amuah dicampya jo aia. Dalam iduik ko, kito musti bajaleh jaleh tampek tagak. Ka ikuik jubilih atau ikuik malekat?" baleh Mak Uniang.

Malanca haniang...