Notification

×

Iklan

Iklan

Maluruihan Sejarah

22 Januari 2022 | 08.17 WIB Last Updated 2022-01-22T01:18:14Z
Ditulis oleh : A. S Patimarajo



Pasbana | Untuk Kabar Sumbar
- Lalok sakalok barasian. Tagamang tasantak tidua. Ta ampeh tangan ka lantai. Diresek tapi kain, mimpi lanyok sakatiko. Sapanjang jalan Malanca bapikia kareh, apokoh nan ka tajadi? Dalam mimpi Malanca sobok jo Garundang anak Malinkundang. 

Kecek si Garundang, ayahnyo dulu tu, ndak durako bagai doh. Urang sakuliliang nan manuduah apaknyo durako. 

" Baliau didzolimi. Sado urang manunjuak iduang liau. Sudah tu tangan apak ambo dikabek. Sampai mati tak ado nan mambela. Iko sejarah musti diluruihan, " kecek Garundang mandareh. 

Malanca tananang mandanga Garundang, nan nampak takah bayobana. 

" Jadi baa nan sabananyo Garundang? Jalehan lah ka wa-den, supayo bisa lo waden sampaian ka kawan-kawan, " tanyo Malanca. 

Si Garundang mamulai carito. 

" Apak ambo dulu tu payi marantau sudah sunat rasul. Inyo balayia sampai ka nagari jauah. Lamo bainduak samang ka Mak Lanin tukang buek sumbu kompor. "

Labiah kurang ampek puluah tahun di nagari urang, sakali wakatu inyo pulang kampuang mambaok ambo jo amak ambo. Tibo di halaman, nampak rumah gadang lah runtuah. Apak ambo manangih maimbau amaknyo. 

Sudah tu, kalua surang padusi dalam gubuak ketek, nan lah bungkuak dimakan umua. Amak tuo tu mangaku apak ambo anaknyo. 

Dipaguiknyo apak ambo. Apak ambo mailak. Apak ambo ndak mangaku urang gaek mumuak tu amaknyo. Sabab amaknyo dulu rancak ruponyo. Baa kok kini tibo-tibo urang tuo lapuak tu mangaku-ngaku jadi amaknyo. 

Urang gaek tu manangih mangungu-ngungu. Apak ambo tatap ndak mangaku itu amaknyo. Urang gaek tu tatap sajo manggaragai . Apak ambo tabik suga. Disipaknyo amak gaek tu. Sajak tu urang kuliliang manuduh apak ambo durako. 

" Padahal inyo hanyo lupo, baso urang gaek tu yo bana amaknyo nan rancak dulu tu, tapi lah lapuak dimakan umua, " jaleh Garundang badalia panjang leba.

Tambah lo, kecek Garundang, apaknyo dituduah jadi batu. 

" Padahal cuma jadi kurapa. Nan batu tu kan hitam. Mayik apak ambo kuniang amba, sarupo dindiang ngarai, " bela Garundang. 

Malam tadi sudah sumbayang Isya di Musajik Munawarah, Curito Garundang ko diaampaian Malanca ke Mak Uniang. 

" Baa lai tu Mak Uniang. Garundang mangecek dalam mimpi jo ambo, apaknyo didzolimi, " kecek Malanca. 

" Pabia se lah Nca. Mimpi tu bungo lalok mah, Ijan  yobana pulo lai. Dunie ko cuma samantaronyo. Ama ibadah sajolah pa banyak, " jawek Mak Uniang takaja pulang, sambia masang tarompa. 

Malanca tapana...... 
×
Kaba Nan Baru Update