Ditulis Oleh : A.S Patimarajo
Samaso Mak Uniang ketek, tahun tujuahpuluahan, urang kampuang payi ka pasa naiak oto tambangan. Oto tu banamo tirta sari, tambuo, setia kawan, kawan setia, merah jambu.
Sadonyo punyo urang Bukiktenggi, nan sangajo payi manampang satiok Kamih ka Batusangka. Ado pulo nan punyo urang kampuang, mereknyo thomas jo renowali.
Pajalanan ka pasa, manampuah jarak sambilan kilo. Panumpang mamanuhi oto tiok tirip. Nan jaleh saisi oto tu, bakarib kerabat, handai tolan, sanak sudaro, ando manyumando, ipa bisan.
Takalo sitokar cingkariak mintak ongkos, panumpang ateh oto barabuik mambaia an karik karabat, sanak sudaro tadi.
Tapi nan acok mambayia handai tolannyo nan baumua labiah tuwo. Sabab, baliau nan tuwo tuwo maso itu, masiang masiang punyo panyimpanan. Bamiliak surang surang. Kok nan barek, tasimpan di surau tampek baliau tingga. Kalau nan ringan dibawo kamaa payi, bapulun dalam pakaian.
Salah surang diantaronyo Mak Gain. Baliau ko hiduik biaso biaso sajo. Kok baju antaro duo jo tigo pasang. Kain saruang baitu juwo. Salai bugih makasar untuak ka Jumat. Duo alai cap padi untuak sumbayang limo wukatu.
Samantang pun baitu, panyimpanan baliau takabek dalam saku sarawa kotok. Cukuik untuak mambali duo ikua kabau gadang. Caro kini sakitar tigo puluah juta. Kato baliau maso itu, guno pitih disimpan, maa tawu ado anak kamanakan, kaparaluan mandasak. Iko lah tampek batenggang.
Bak papatah urang saisuak: Ingek sabalun kanai. Malantai sabalun luluih. Maminteh sabalun hanyuik. Ado indak dimakan. Lah ndak ado moko dimakan. "Umpamonyo, kok tibo urang nagari mintak sumbangan. Atau sobok sumandan di ateh oto. Atau samo makan jo bisan di pasa, tantu dibayia dek awak. Ikolah guno panyimpanan," kecek Mak Gain.
Caro bapikia urang tuwo tuwo sarupo iko, Mak Uniang caliak hinggo tahun lapan puluhan. Sasudah itu, di awa tahun sambilan puluhan, takalo Mak Uniang mulai karajo di surek kaba, nampak juwo baso jo basi nan sangek bararti dek Mak Uniang sampai kini.
Suatu kali Mak Uniang maliput barita ka kantua DPRD Sumbar nan talatak di ujuang jalan simpang tigo. Ndak sangajo basarobok Almarhum HKR Datuak P Simulie sadang maetoang pitih. Baliau ko maso itu salain anggota dewan juwo katua pucuak limbago adat Minangkabau.
Pas, baliau maengoang ka arah pintu ruang, baliau tasanyum. Mak Uniang langsuang mailak kalua. Ruponyo Mak Datuak ko maraso. Sambia turun janjang, baliau manyalek an sahalai uang karateh ka saku Mak Uniang.
Kutiko pulang kampuang, Mak Uniang curitokan ka Mandeh nan juwo lah tabilang tuwo maso itu. Kato Mandeh, itu namonyo baso basi urang baradat. "Itu nan baparasaan. Urang babudi. Ba a pulo rasonyo, ndak ka maagiah. Samantaro baliau sadang bapitih banyak," kato Mandeh.
Akia tahun sambilan puluhan, manjalang reformasi, Mak Uniang bakarajo di kantua gubenur. Maso tu Mak Uniang paratian, jikok ado samo minum pagi, sarato makan tangah hari di kadai balakang, pajabat nan tinggi eselonnyo mambayia an minum makan nan sameja jo inyo.
Ado pulo pajabat tu, malu payi ka kadai surang sajo. Dicarinyo kawan untuak mahota.
Sakali wukatu Mak Uniang nan pagawai baru, dibawok surang pajabat ka kadai minun pagi. Kutiko tu Mak Uniang batanyo, manga ndak baliau surang sajo payi? Baliau manjawek, beko disabuik urang baliau tu pilik. Payi makan surang sajo.
Bilo samo minum di kadai, jikok awak nan tenggi pangkek, mambiayia minum awak surang sajo, mako urang mangatoan awak pilik. Ba itu hukum alam nan tasuo di kantua gubernur nan dialami Mak Uniang maso itu.
Curito ko disampaian Mak Uniang ka Malanca, takolo samo makan di rumah urang baralek, sudah sumbayang mugarik, Kamih kapatang.
Malanca batanyo, "Kini ko ba a di kantua gubernur tu Mak? Lai koh takah dulu tu juwo?"
"Ndak tapantau pulo dek ambo doh Nca. Sabab, lah tujuah tahun ambo pindah dari sinan," jawek Mak Uniang singkek.
Malanca maangguak sambia mangamek...
