Ditulis Oleh : A.S Patimarajo
Manulih tu sarik sarik murah. Kadang sarik, kadang murah. Dibuek mugarik, sudah subuah. Dimulai subuah salasai luhua. Rumik.Tagantuang situasi. Suatu maso dulu, maso bagolak, si Dulah dapek etongan dari anak buah Pono mambuek buku urang santiang.
"Dulah, toloang angku buek buku urang santiang nagari ko dih. Muek sajolah agak saratuih urang. Beko manarimo angku tigo rupiah ciek tulisan," mintak anak buah Pono ka si Dulah.
Dulah langsuang bakarajo. Dicarinyo kawan anam urang. Batujuah jo inyo. Barumbuak mamiliah ka ditulih. Abu abu salayang, dimasuak an juwo ka nan putiah. Kandak buliah, pintak balaku. Sasuai parmintaan, buku ko salasai awa tahun. Anak buah Pono bangga. Ka si Pono dijalehannyo, baso buku urang urang santiang tu lah sudah. Pono sato pulo sanyum.
Dek Pono nan paralu galanggang ko rami. Banyak tamu datang mambari salamat. Pakaro sangu nan dek banyak urang sangek paralu bana, Pono tak mau tahu. Sabab urusan remeh temeh tu, ado anak buah nan mangakok.
Manuruik adatnyo, karajo lah dibagi abih. Ganggam lah ba untuak. Pangulu hanyo maangguak manggeleang. Manti cuma maagiah saran. Mualim hanyo tukang do'a. Tibo di Dubalang nan capek kaki ringan tangan, karajo yo agak talabiah. Kini Pono tagak di pangulu pucuak. Nan tinggi nampak jauah, nan basa nampak dakek.
"Bisuak kutiko baralek urang surek kaba, kito bagian buku ko yo. Supayo basuluah matoari, bagalanggang mato rang banyak. Asiang ciek untuak Mak Inggih," parintah Pono. Maklum sajo, Mak Inggih ko salain kapalo nagari. Baliau juwo bagala Rajo Alam. Panguaso guguak nan limo. Nagari gadang.
Tapi, bak papatah juwo, malang sakijok mato, mujua sapanjang hari. Rumah sudah tokok babunyi. Tigo bulan sudah baralek, nan upah si Dulah alun juwo babayia. Dulah jo kawan kawan manunggu juwo buah ko, kok layi ka rareh. Tapi lah dinanti ndak juwo jatuah.
"Iko samo mananti durian batampuak basi mah," kecek Dulah mamburansang ka anak buah Pono.
"Yo tunggu santa lu. Iko salah paretongan pulo masin simpoa ko ha. Dulu tatulih dalam buku gadang, tigo rupiah ciek. Ruponyo tamasuak dalam buku ketek duopuluah rupiah kasadonyo," jawek anak buah Pono manyabaan si Dulah.
"Jadi, ba a? Bilo ka angku bayia upah kami ko? Kecek angku murah manulih tu. Abih tinago dek inyo mah!" hariak Dulah.
"Layi ka kami bayia. Tunggu lu. Kami cari jalan kaluanyo lu dih," kecek anak buah Pono jo suaro lunak lunak amba.
Curito ko disampaian Mak Uniang ka Malanca sudah sumbayang subuah pagi tadi.
"Ba a lo takah itu, Mak. Kecek nabi, upah dibayia sabalun paluah tukang kariang!" tanyo Malanca.
"Yo, Nca. kadang, kan dek banyak ragu, dek lamo lupo. Makonyo, isuak waang kok jadi urang gadang, ijan sumbarang taosok sajo. Pikia pikia dulu karajo ka dibuek," nasihat Mak Uniang jo suaro sandek.
Malanca maangguak. Dalam ati inyo mangecek, kalau jadi urang gadang tu, musti banyak gadele malapeh kabek...
.jpeg)
