Buya Malanca

Ditulis Oleh : A.S Patimarajo

Sakali malam kapatang, Malanca maisi wirik tarawiah di surau bawah. Inyo ditunjuak manggantian  Mak Uniang ndak tibo. Tasabab sairiang sajalan jo Mak Uniang ka musajik, Malanca dipicayo bacaramah.

Jo kaki maretek, suaro sakek buya ko mulai bicaro. Mako takah iko kato Malanca maagiah nasehat.

Kini di kampuang ko lah banyak masin bajak. Sawah dibajak jo masin. Lapangan karajo makin kurang. Sabanta layi batanam padi jo masin pulo. Makin tasapiklah urang nan  biaso ka sawah. Mako baruntuanglah urang nan punyo banyak sawah. 

Kini ka sawah anak mudo mudo anggan. Mantang mantang lah sikola tinggih, ndak amuah ka sawah. Bakaja ka jadi pagawai. Kok indak ka rantau manggaleh kaki limo. Tapi galeh hah kurang pulo lakunyo kini. Sabab, urang bali baju mamasan jo hape barang tibo ka rumah. Aratinyo batambah sampik lapangan karajo.

Tapi ado galeh nan laku maso kini. Manjuwa pulsa hape. Banyak urang kini punyo hape. Ado nan punyo tigo, ampek sampai limo hape. Satiok hari pasti maabihan pulsa jo paket internet. Karano tu tapek tagak manggaleh pulsa.

Nan lamak bana jadi panitia dibuek lomba lagu.  Diagiah pamanang urang nan banyak dapek kiriman es em es. Karajo samo jo urang punyo pulsa tu. Iko pasti banyak lakunyo. Urang gadang gadang, urang cadiak pandai, amuah pulo maagiah es em es tu, supayo nan kanduangnyo bisa manang. Baitu santiangnyo panitia bakonsi jo urang manggaleh pulsa.  Kapalo apak dosen jo buk guru bagai bisa digalehannyo.

Babeda  kini jo maso dulu. Kalau kini cadiak nan bajua, binguang nan babali. Urang cadiak maso dulu, yo diakui ilemunyo. Sahinggo diundang urang kamari payi. Diakui urang baso inyo bailemu. Diagiah gala dotor karano inyo yo hebat. 

Cadiak urang kini didatangannyo urang santiang, sudah tu inyo nompang mangecek pulo jo urang santiang tadi di muko anak muriknyo. Poto poto jo urang santiang tu, dikirim ka induak samang, supayo dapek pulo gala dotor. Sudah tu mintak  diakui inyo lah santiang pulo.

Itulah pangajian malam kini. Kok ado salah jo gawa, ambo mintak maoh. Tarimokasih. Wasallamualaikum. 

Sudah tu Malanca turun langsuang tagak, malanjutan tarawiah.

Pagi tadi sudah sumbayang subuah, Mak Uniang batanyo, "Apo pangajian nan waang agiah malam patang tu, Nca?"

"Kaji nan dulu juwonyo Mak,"

"Nan maa tu?"

"Curito wak kalamari. Cadiak bajuwa binguang babali. Tapi itu kecek Mak Adang ka Mak Uniang di lapau simpang mah!"

Oowwwwo.....Mak Uniang galak sengeang...