Balibur ka Kampuang

Ditulis Oleh : A.S Patimarajo

Sajak dahulu niniak muyang urang awak bapituwah: karatau madang di hulu, babuah babungo balun, marantaulah bujang dahulu di rumah paguno balun.

Aratinyo jikok alun paguno awak di kampuang, mahanok sajolah di rantau dulu. Tapi jikok kapulangan awak lah baguno dek urang kampuang, mako pulanglah ka kampuang.

Baitu bana niniak muyang mamirek anak anak mudo Minang, supayo basumangek bajuang maraiah rasaki di rantau. Rasaki ko ado duo macamnyo: rasaki bantuak putih jo harato bando, rasaki ilemu agamo jo pangatahuan.

Apo sajo dari kaduonyo ko, jikok dibaok pulang kampuang, mako bararti awak lah baguno di kampuang. Usah malaruik laruik bana di rantau. Acok acok sajolah pulang, supayo sanang pulo arawah niniak muyang nan mambari pituah.

Pado musim rayo, satiok tahun,  banyak urang rantau pulang kampuang. Kapulangan parantau ko, jikok dicaliak layi nyato mambaok barakah ka urang kampuang. Kadai nan tadinyo langang kini lah rami. Parak nan tadinyo samak kini lah tarang. Tantu sajo nan manarimo labo jo upah karajo, urang nan manatap di kampuang.

Pulang ka kampuang, adolah sarancak rancak payi balibur dek urang  rantau. Jikok payi liburan ka nagari urang lain, lah kajaleh awak tamanuang manuang sajo manikmati jo badan surang atau jo kaluarga surang. Samo takah turis lua nagari masuak ka kampuang awak. Tak banyak urang nan manyapo.

Tapi jikok awak pulang ka kampuang surang, mambao kaluarga jo anak anak, mako banyak urang nan manyapo. Mulai dari duduak di lapau sampai payi mandi ka pincuran, ado sajo urang nan tahu jo awak, sarato inyo manyapo manyalami awak. Taraso salam bajawek jo kasiah sayang. Mako di sinan talatak mewahnyo balibur ka kampuang wak surang.

Hanyo sajo satiok baiak ado pulo kurangnyo saketek. Jikok awak balibur ka kampuang urang lain makai pakaian mewah jo oto mewah, ndak ado urang nan  babisiak bisiak tantang awak, mancaliak lagak jo gaya awak.

Takalo awak baliak ka kampuang mambawo oto mewah, sarato salamo di kampuang mamakai sagalo mewah, mako bisiak bisiak di baliak dindiang jaleh tak  tabanduang. Sabab,  itu lah ka jadi sipat dek manusia. Suko manilai urang nan awak katahui. 

Apo layi, urang kampuang  tahu bana  asa muasa hiduik awak. Urang tahu suduik dapua awak. Sasok jarami, pandan pakuburan awak.  Jikok tasabuik elok jo buruak bakeh awak, itu biaso sajo. Usah dibawo masuak hati.

Pulang kampuang tahun kini, urang kampuang Mak Uniang mambawo barakah bana. Satidaknyo ciek rumah dalam ciek joroang dipelok i dek parantau. Istilahnyo bedah rumah caro dalam tipi. 

Rumah nan tadinyo nampak usang kini lah segeh jadi baru. Apo layi jikok parantau amuah manambah pulo sadakah jadi modal usaho, untuak nan punyo rumah tadi. Mako, tarimokasih banyak bakeh parantau. Bajaso bana bakeh nagari.

Jikok tiok tahun parantau mambuek takah iko,  tantu lamo  lambek  ndak ado rumah nan buruak dalam kampuang. Sadonyo rumah lah layak huni, istilah urang kini. 

Cubo kito bayangan jikok satiok nagari di Minangkabau mambuek sarupo iko, tantu sangek bararti bana baso parantau Minang lah sukses manoloang karajo pamarintah dalam mamakmurkan masyarakat.

"Ba a manuruik Malanca tu?"  kecek  Mak Uniang baiyo ka Malanca sudah sumbayang subuah pagi tadi di musajik. Malanca ndak manjawek. Inyo  maraso, kalau inyo ndak banyak babuek karano salamo ko di kampuang sajo.

"Ndak paralu pulo waang maraso randah diri doh, Nca. Jikok sadonyo anak mudo ko marantau, tantu ndak ado lo nan mauruih kampuang ko," pinteh Mak Uniang mambaco pikiran Malanca.

Malanca tatap hanok sajo....