Anak Urang Tu

Ditulis Oleh : A.S Patimarajo

Kecek urang tuwo tuwo di lapau simpang, maso bagolak dulu banyak kajadian nan ganjia ganjia. Sudahlah urang gilo dibawok barundiang dalam rapek. Ado lo kaba main silap mato di nan rami. Maubah karateh jadi pitih. Simsalabim, mako kareke bisa jadi ameh.

Maso itu, main sulap di tangah pasa, dipakai  pulo dalam nagari. Kajadiannyo takah ko. Suatu kali Mak Inggih kapalo kampuang, mamanggia Jama an jo Ciani. Kaduo anak buah Inggih ko, diagiah karajo barek dek induak samang. 

"Bisa kalian manabuih ladang nan lah lamo tagadai. Cubolah kalian pikia kan. Waden tak mau tahu. Pokoknyo ladang nan laweh tu, sabalun musim mancik tibo, lah baliak ka awak. Awak nan punyo, agak saparo jadih juwo," parintah Inggih takah yo bana.

"Payah mah, Mak. Ladang tu lah tagadai maha. Pitih awak ndak ado panabuihnyo," jawek Ciani jo Jama an.

"Kok ado pitih, lah sajak dulu  waden tabuih mah.  Iko kan dek indak ado pitih, mako kalian waden suruah bapikia," jawek Inggih sambia galak kencoang.

Dalam pado itu, kaduo nak urang ko bamufakat mambuek siasek. Datanglah mareka tu, madok ka rumah Mak Pilik, nan mamagang ladang sajak saisuak. "Ba a caronyo ko, Ngku. Induak samang kami mintak manabuih ladang tu. Samantaro pitih kami ndak ado," kecek duo urang ko taruih tarang.

Mak Pilik icak icak tamanuang. Sudah tu baru inyo manjawek. "Apo lo nan kapayah bana dek kalian. Kini co iko caronyo. Juwa sawah kalian nan bunta salakuak gadang tu, ka waden. Saharago panabuah ladang kalian tu saparonyo. Ka Inggih lah waden jalehan pakan nan lapeh mah," kecek Mak Pilik.

Anak urang baduo tu tamanuang. "Jadi alah baretong Ungku jo induak samang kami. Tapi ka kami, ndak ado dikatokannyo, baso baliau lah sobok jo Ungku," baleh anak urang ko mananyo. 

Sambia sengeang badak, Mak  Pilik mambawo nak urang tu baganjua ka ilaman. "Inggih tu, cadiak mah. Makonyo waden suai jo inyo," jawek Pilik ka anak urang tu. 

Sambia baliak pulang ka rumah, dalam hati anak urang tu, bakato, apo mukasuik induak samang manabuih ladang jo pitih juwa sawah. Batuka baruak jo cigak taimbuah pulo sikua karo. 

Samantaro, sapiningga anak urang tu, Mak Pilik galak manih. Ka urang rumah jo kolega disabuiknyo, baso, nan diama lah pacah, nan dimukasuik alah sampai. 

Maso bagolak tu, Mak Inggih mauruih kampuang balambok lambok sajo. Ndak paralu bakaruik kaniang. Galak sajo dipabanyak. Alah bailan, alun mintak janji. Kok janji biaso mungkia, titian biaso lapuak. Dalam manggaleh, batuka cupak jo gantang biaso sajo. Rugi rugi saketek ndak ba a, asa awak tamusahua.

Intinyo, nan paralu dek Inggih masyarakat tahu, baso inyo lah barhasia manabuih ladang nan tagadai maha. Pakaro sawah nan bunta bajalan manabuihnyo, itu urusan lain. 

Pado maso itu, mangkuih bana ilemu takah iko. Namonyo galeme maso malese. Awak ndak paralu ebat, nan paralu ba a bisa urang lain, mangatokan baso awak tu ebat. Kecek urang di lapau, siapo sajo nan makai jurus iko, salamat manitih buiah.

Kutiko curito ko disampaian Mak Uniang ka Malanca sudah sumbayang subuah pagi tadi, Malanca batanyo, "Ilemu galeme tu apo tu, Mak?"

"Galeme tu samo jo loge mah, Nca," jawek Mak Uniang santai sambia jalan pulang.

"Kalau galeme samo jo loge, bararti samo lo jo gadele. Nan bisa  kanai gadele tantu nan ele, Mak," baleh Malanca. 

Sayang Mak Uniang ndak mandanga, karano baliau lah masuak dalam rumah.......