 |
| Ditulis oleh : A S Patimarajo |
Pasbana.com -- Dulu maso bagolak, tajadi ujan labek dalam nagari. Sajak siang sampai malam, ditintiang hujan. Malam itu juwo banyak jambatan putuih. Banyak tanah lonsor manimbun jalan. Sahinggo payah mambawo kaparaluan urang kampuang nan baubungan dari pasia ka darek, dari darek ka pasia.
Sangkek itu pulo, anak nagari mamikia apo panyabab banjir mahalau sawah, manimbun ladang, mamatah jambatan, maruntuah tabiang, manimbun jalan?
Jawek urang bagalau wakatu itu. Ado nan mangecek karano kini musim hujan. Angin bagarak dari lawik hindia, taruih ka Sumatera. Sahinggo ribuik mambawo pikarak. Hujan labek tak bisa ditahan.
Ado lo nan mangecek, musibah ko tajadi, karano banyak nan manabang kayu di hulu. Akibatnyo gadang aia ka muaro.
Kasado pandapek tu, jikok diukua jo ilemu rasonyo masuak aka. Tapi kutiko batanyo ka Ungku Malin, maso itu baliau manjawek: iko tasuo karano doso nan kito pabuek dalam nagari.
"Mungkin banyak awak badoso. Mungkin banyak tingkah laku kito nan tak suai jo adat jo ugamo. Mikia sajolah apo nan kito karajokan salamo ko. Pabanyak sajo mintak ampun," kecek Ungku Malin manjawek tanyo.
Sasudah itu, Wakia Ungku Damang mangecek pulo, datangnyo musibah bisa dikaik an jo parangai anak nagari nan mambuek masiat.
"Akia akia ko, masiat, di nagari kito lah marasahan urang kampuang. Anak anak kini lah banyak jadi Kaum Nabi Lut. Jumlahnyo di nagari baradat ko lah sambilan baleh ribu urang. Kamanakan kito tu lah kanai panyakik. Iko tamasuak parangai nan maundang musibah," kato baliau.
Kutiko carito ko diulang baliak dek Mak Uniang ka Malanca sudah sumbayang subuah di musajik pagi tadi, batambah pulo bumbunyo dek Mak Uniang. Kecek baliau, kalau lah banyak urang tukang cameeh dalam nagari, mako itu juwo maundang bancano.
Malanca batanyo. "Apo lo contoh cameeh tu, Mak?"
"Misalnyo urang mambuek kotak kotak dari kardus. Kecek urang tu, kotak kardus ko samo kueknyo jo kotak aluminium. Sudah tu di awak babuek pariuak dari kardus. Panimbo aia dari kardus. Sagalo dibuek dari kardus. Itu cameeh namonyo tu," jawek Mak Uniang galak sengeang.
Malanca galak tatahan. Sabab inyo acok lo mancameeh....(*)
