Notification

×

Iklan

Iklan

Wasit

24 Maret 2019 | 08.31 WIB Last Updated 2019-03-24T01:39:48Z
Ditulis oleh : AS Patimarajo

Pasbana.com --- Kini rami rami mintak wasit dari lua, supayo adia dalam maituang suaro. Takana dek Mak Uniang, Stroombringger,  namo sipak bola di joroang Mak Uniang maso saisuak di tahun tujuahpuluhan. Pamainnyo santiang santiang, sainggo bisa juara satu, dapek marabuik piala anak ka ka en IKIP Padang.

Dulu tu walau lapangan alun sarancak kini, anak anak nagari main bola sumangeknyo tenggih. Tujuah joroang di nagari, dapek giliran sahari surang untuak bamain dalam sapakan. Nan bamain ko kawan kawan pulang sikola jo kakak kakak pulang dari sawah, pulang dari batukang.

Kalau ndak salah pambagiannyo takah iko: Joroang Pauah hari Akad, Joroang Guguak Kaciak hari Sanayan, Joroang Guguak Gadang hari Lasa, Joroang Guguak Baruah hari Baah, Joroang Gantiang hari Kamih, Joroang Bulakan hari Jumat, Joroang Patai hari Satu.

Pambagian hari sarupo itu, hanyo sakadar tangguangjawab di lapangan. Kok ado datang bamain dari joroang lain buliah juwo.

Maso itu anak ka ka en, mambuek  tandiang bola antaro joroang. Kutiko itu tujuah joroang tadi diadu main. Sabulan maso batandiang, tarakir dapek  pinal Stroombringger dari Guguak Gadang  basarobok jo Gembar dari Joroang Guguak Baruah, joroang sabalah.

Partai pinal ko  angek. Mako nan jadi wasit dimintak dek panonton urang dari lua. Sabab jikok urang dalam bisa takarik. Indak adia. Bisa maundang lego pagai. Akianyo jatuah pilihan  wasit tangah lapangan jo wasit garih tapi, anak ka ka en nan barasa dari nagari lain.

Sabab mako diambiak wasit urang lua, supayo main nyaman, pamain sanang, tak ado raso cimburu takalo wasit maambuih piluit maagiah hukuman. Tanyato iyo. Main aman. Ndak ado tajadi kacurangan. Kaduo balah pihak manarimo pimpinan wasit.

Dalampado iko, hasia akia sudah diadu duo kali ampekpuluah limo minik, main imbang satu samo. Tapi karano pinal ko sagi tigo, Stroombringger dapek nilai paliang tenggih dari hasia sakali manang sakali drau.

Sabalunnyo, hasia survey mangatokan nan juara tu Gembar. Sabab lapangan main talatak di joroang inyo. Pandukuang panontonnyo rami. Tanyato  hasia akia beda.

Namonyo main, tatap sajo ado suaro suaro mamancing ribuik. Maklum sajo barami rami, kadang kecek sumbarang kalua sajo sasamo gadang.

Akianyo bagalegoh pegoh juwo saketek sambia pulang, antaro pandukuang masiang masiang. Tapi karano awak bamain sakampuang, siarak di tanah lapang sanjo cako, barakia jo galak galak minun kopi malam hari kutiko piala dibagian anak ka ka en.

Kutiko carito ko diulang Mak Uniang ka Malanca sudah sumbayang subuah  pagi tadi, Malanca batanyo, "Mak Uniang lai sato main maso itu?"

"Waden nonton sajonyo, Nca," jawek Mak Uniang.

Malanca manggeleang....
×
Kaba Nan Baru Update