Ditulis oleh : A.S Patimarajo
Satiok hari karamat dicaliak dek Malanca, anak nagari upacara di lapangan balai adat masiang masiang. Mak Inggih sabagai Ungku Palo mamimpin upacara di tanah lapang muko balai adat dakek rumahnyo.
Tibo sabagai tamu kahormatan Etek Baya jo anak padusinyo nan taruih ikuik amak kama payi. Mak Andah wakia Mak Inggih ndak katinggalan babaju adat sarato urang rumah.
Inyiak Labai wakia Mak Inggih musim katibo, jo urang rumah nan ma kolah. Kabanyo urang rumah baliau ado duo. Mak Jambang nan mulai takucia, tibo pede bakacomato itam. Ado pulo tamu tamu lain kalangan urang tanamo.
Nan indak tibo, Datuak Gamuak karano inyo manungguan mandehnyo sadang sakik tuwo. Tasabab ndak bisa tibo, kasampatan pulo dek Datuak Gamuak manyuruah anak jo minantunyo manyampaian salam hormat ka Mak Inggih di muko urang rami.
Mak Inggih lah paham jo caro Datuak Gamuak maanjuangan anak. Iko kaji lamo. Gaya urang saisuak. Caro caro iduik di kampuang, yo takah itu. Masuak bana.
Samantaro, Datuak Kayo sajak sudah bagolak, ndak ado sato sato upacara jo datuak palo. Inyo punyo upacara sorang jo koleganyo di tanah lapang. Baliau bana mamimpin upacara tu. Ndak kalah pulo raminyo dibandiang upacara Mak Inggih.
Datuak Kayo lah kanamonyo. Sabana kayo. Dulu jo bakudo bagai inyo mamareso barisan anggotanyo. Gagah bana. Cuma ndak rami urang surek kaba manyampaian kajadian ko. Sahinggo urang mangiro biaso biaso sajo.
Di tampek lain, Nampak pulo dek Malanca, di hari karamat ko, sanang bana hati Mak Tuan. Raso padi masak jaguang maupiah. Pucuak dicinto ulam tibo. Sumua dikali aia datang. Awih lapeh litak ilang.
Sanyum sanyum Mak Tuan manyalami urang sapanjang jalan. Samantaro Mak Atun duduak manapi.
Biasonyo di hari karamat ko, Mak Atun pakai jas do dasi ka tanah lapang. Kini jas jo dasi tu lah dipakai dek Mak Tuan. Mak Atun kalah sakapalo dek Mak Tuan wakatu mancaleg kapatang.
Walau cuma kalah duo suaro dari Mak Tuan. Nan Mak Atun musim kini tapaso isturahat pakai dasi. Sabab kurisi tampek duduak tabateh. Kok layi bisuak mancalon Mak Tuan jadi datuak palo ketek, bisa Mak Atun manggantian kurisinyo. Ba itu adatnyo zaman kini.
Kutiko kisah ko dicaritokan Malanca ka Mak Uniang sudah sumbayang subuah pagi tadi, Mak Uniang manjawek, "Hiduik ko yo takah itu. Kadang roda di ateh, kadang roda di bawah. Tibo di ateh ijan galak balabiah bana. Jikok sadang di bawah ijan ibo hati bana. Biaso biaso sajolah. Ikhlas tawakal sajo pado Allah Ta'ala."
Malanca dapek nasihat....
.jpg)
