 |
| Penulis : A.S Patimarajo |
Inshaa Allah pakan katibo, Etek Baya baralek duwah tapai. Datuak Kayo diundang kusus sabagai tamu tahormat. Tando baliau tahormat, sajak pakan nan lapeh, sasudah makan nasi goreang, lah dibari tahu dek Etek ka baliau.
Datuak Kayo, batarimokasih mandanga undangan disampaian Etek sacaro langsuang. Ba itu bana sagan Etek ka Datuak Kayo urang nan arih bijaksano, urang tapandang randah hati.
Tapi samantang pun ba itu, lah jadi sipat pado alam, satiok ado urang dapek rahmat, ado sajo anak nagari nan ndak sanang. Mandanga Datuak Kayo urang paratamu diundang Etek, agak tarumuak Mak Jambang dapek kaba nan bak kian.
Salaruik salamoko, lah limo kali masak padi, apo sajo acara dirumah Etek, Mak Jambang taruih jadi janang. Walau babeda suku, tapi di rumah Etek Baya, baliau bisa jadi silang nan bapangka, karajo nan bapokok. Jambang ahli tatiang manatiang, angkek maangkek satantang hidangan nan ka tangah.
Dimaa latak kapalo kambiang. Dimaa lapak ikan siam. Sarato dimaa pulo gulai kalikih, Mak Jambang nan manyusun sampai ka suduik. Sahinggo balirik bak pinang, baaturan bak siriah. Rancak dicaliak, sasuai dipandang. Tapi di musim paneh maso kini, Mak Jambang maraso taicia.
Ruponyo ndak Mak Jambang sajo nan banasip takah itu. Ado pulo Mak Lambuik Binaso Panyakitan, Mak Uwia Bakeh Palimo, tambah Datuak Gamuak batigo baranak. Sadonyo maraso tasisiah.
Kaba kaba angin, urang nan batigo samo gadang tu, ka mangadu ka Mak Inggih nan sadang jadi kapalo nagari. Sabagai anak angkek Etek Baya, Mak Inggih mungkin dapek manyubarangan pandeka tigo sarangkai tu, ka rumah Etek.
Tapi sayang saribu kali sayang, Mak Inggih ndak pulo bisa lalu aso ka rumah Etek maso kini. Antah apo sababnyo, Etek sadang payah diyakinan. Mantagi Etek sadang tenggih. Beko salah salah masuak, babaliak awa panabangan.
Walau jadi kapalo nagari bana, Mak Inggih kalau jo Etek Baya tatap manakua. Sabab Etek tu ibarat pisau bamato duo. Saligi baliak batimba. Jikok mangesoh, tak ujuang pangka manganai.
Apo layi Etek sadang dakek jo Datuak Kayo. Jikok batampuak nagari ko, bisa dijinjiangnyo sabalah tangan. Takah tu bana kuwatnyo pangaruah Etek jo Datuak Kayo taradok anak kamanakan.
Banyak urang nan batanyo dalam hati. Tapi ndak tantu ka sia ditanyokan. Apo garan nan katajadi sasudah iko?
Mak Uniang batanyo itu pulo ka Malanca sasudah sumbayang subuah pagi tadi. "Mamak batanyo ka ambo. Samo mintak sisiak ka limbek mah," jawek Malanca.
Sakali ko Mak Uniang tapana....
