Pasbana - Jua bali sebaiknya saling mengikhlaskan. Jan sampai ado nan terdzolimi. Sanak kok mambali buah jan maago bana haragonyo. Kok ado tampek lain nan labiah murah, silahkan basalisiahan dulu.
Baniaik sajo basadakah ka sanak kito. Dunsanak kito manjua buah-buahan bagai duku, rambutan, ciku, langsat, jo lain-lain indak untuak mancari kayo bagai. Dapek sangenek tuk kaparluan rumah tanggonyo, lah Alhamdulillah...
Kadang-kadang banyak urang awak, katiko balanjo ka kadai moderen, indak tapikia untuak batanyo haragonyo. Bara sajo nan tatulih, langsuang dibayia.
Katiko indak ado pitih kambali, diiringkan jo gulo-gulo duo ikua dek panjago kadainyo. "Maaf, Bang.. tak ado uang kambalian, ambiak lai gulo-gulo ko yo.." kecek panjagonyo.
Alah tantu bana nasib panjago batang durian iyo baitu pulo. Indak lalok bagai, batanggang dari pagi sampai litak.
Kadang indak manusia sajo nan mananti buah duriannyo masak, rimau balang juo tabik pulo sukonyo jo buah durian tu. Durian jatuah, nan panjago tibo, nan rimau balang lah datang duluan.
Jadi, kok mambali buah jan bana maago haragonyo. Ado sikik salamonyo dek kasanak awak ko alah basusah payah itu. (sutan)
