Juara sipak bola dunia tahun 2014, Jerman, tapaso pulang kampuang di bulan Juni. Sabab nan bisa batahan sampai Juli 2018 di Rusia hanyo nan masuak duo di ateh, yaitu Swedia jo Meksiko. Samantaro Jerman nomor kuncit grup F di bawah Korea. Baitu barita kalua dalam tipi di lapau simpang, pakan lapeh.
Paratamu kali main, Jerman kalah dek Meksiko duo kosoang. "Meksiko tatap manjago tanago. Inyo hati hati maadok i Jerman nan lah tamusawua di sipak bola. Juara batahan Jerman tu, jeleh picayo diri masuak lapangan. Tapi nan Meksiko ndak takuik maadok i. Akianyo Jerman latiah. Nan juara batahan ko, kalah," kecek tukang siar.
Kecek panyiar tu pulo, main kaduo Jerman manang malawan Swedia duo satu. Inyo maanggap Swedia ko tangguh, samo samo dari Eropah. Mako sungguah sungguah anak anak Jerman ko maadok i lawan. Akianyo babuah manih. Dapek nilai panuah. Jerman baliak piciyo diri. Tingga lai lawan Korea tim lamah dari Asia. Jerman yakin manang.
Ruponyo babaliak awa panabangan. Main nan ka tigo, Jerman kalah pulo dek Korea duo kosoang. Gol Korea paratamu karano Jerman cayah di muko gawang. Gol nan kaduo, kiper Jerman tarlalu maju ka tangah. Takabua. Disangko kabisa mamasuak an bola. Kironyo tauncang galeh, bola masuak ka gawang awak.
Bak kecek urang tuo tuo saisuak. Sio sio utang tumbuah. Takasia nagari kalah. Karano tu kito ndak buliah babuek sio sio. Sarupo maanggap remeh lawan nan di muko. Namonyo iduik banyak nan ndak disangko. Lawik sati, rantau batuah. Disangko ndak ka manga, kironyo nan jinak mamutuih tali.
Dulu ado lo sipak bola kampuang Mak Uniang, sarupo Jerman jo Korea ko. Karano maanggap remeh lawan kampuang sabalah, akianyo awak nan kalah tigo satu. Asa mulonyo, kampuang sabalah tu pamainnyo ndak cukuik sabaleh urang. Akianyo supayo pas dimainnanyo Kak Uwo nan lah baumua lanjuik.
Satiok Kak Uwo dapek bola dibiyakan sajo. Sabab, manuruik pakiroan, Kak Uwo pasti latiah surang sajo maarak bola. Sakali, duo kali Kak Uwo yo takah tapetai petai. Karano tu Kak Uwo santai santai sajo babak paratamu.
Kudian masuak babak kaduo, Kak Uwo mulai kancang. Nan awak maanggap remeh sajo. Ruponyo bola ko diarak Kak Uwo sampai ka gawang, langsuang masuak, sasudah mangilik kiper. Sudah tu gawang Kak Uwo bobol pulo. Main jadi imbang. Satu samo.
Saparo babak kaduo Kak Uwo makin basumangek. Satiok dapek bola diaraknyo taruih ka gawang awak. Pamain awak pulo nan latiah mairingan Kak Uwo. Tiok sabanta sipak Kak Uwo mangancam. Panonton basorak. Kak Uwo makin manjadi jadi.
Akianyo manjalang piluit panjang babunyi, Kak Uwo manambah gol duo buah. Nan awak nan maraso pamain mudo batinago kudo, takulai.
Kisahko diulang Mak Uniang ka Malanca sudah sumbayang subuah di Musajik Tawakal pagi tadi. Malanca manyolo, "Ruponyo maanggap enteang lawan ko ndak buliah yo, Mak?"
"Yo, Nca. Waang nan ka gadang, isuak sakali kali ijan maanggap remeh lawan main," kecek Mak Uniang.
Malanca haniang....
.jpeg)
