Tahu Diri

Ditulis Oleh: A.S Patimarajo

Pasbana.com -- Tasabuik dalam curito, ado duo urang amak amak basumangek bana manuka Mak Inggih nan sadang mamacik kamudi nagari. Nan surang mangecek lapeh di lapau One punyo Mak Karani. Nan surang lai ilia mudiak manyorak: ganti paja tu.

Takana dek Mak Uniang maso mudo dulu, kutiko jadi urang surek kaba. Ado namonyo Ungku Arun babadan ketek gadang suaro. Baliau mangecek di rumah bagonjoang.

Maso dulu, katonyo,  kutiko inyo pulang   kampuang sudah bagolak. Nampak dek inyo incek mato urang kampuang awak katakutan mancaliak baju saragam. Karano itu baliau baitikat bana mangumbalikan picayo diri anak nagari.

Baliau masuak kampuang kalua kampuang, manyampaian, "Ndak paralu awak takuik takuik lai. Nagari kito lah aman. Kok ka mangaleh mangaleh lah. Kok ka batani batani lah. Kok kasikola sikola lah. Kito ndak masalah lai jo urang nan di ateh."

Sajak itu sumangek anak nagari mulai tabudua. 

Sudah Ungku Arun tapiliah Mak Aneh, jadi wali ranah. Baliau mamakai gaya jo pambawoan tahu diri. Aratinyo kito musti tahu diri. Ranah kito ko sagalo indak. Indak ado nan bisa kito panggakan. Karano tu Mak Aneh pandai pandai ka urang di ateh.

Kok ka pangajian urang ateh, baliau sato. Kok ka kanduri urang ateh, baliau datang. Apo pintak diagiah. Apo kandak dibari. Nan paralu urang ateh sanang.

Sajak itu pulo urang ateh mulai maagiah paratian labiah ka kampuang kito. Jalan lamo dipelok. Jalan baru dibuek. Batang  aia ditembok. Tali banda dipelok. Anak anak nagari ditarimo sikola jauah jauah ka tampek nan santiang. Sudah tu dipakai pulo dek urang ateh mauruih nagari gadang.

Sudah Mak Aneh tibo giliran Mak Asan mauruih ranah. Baliau maisi karangko nan lah dibuek Mak Aneh. Ranah bundo makin tacelak di mato urang ateh. Jalan bakelok  dipaluruih. Labuah nan sampik dipagadang.

Sajak itu pulo padi masak, jaguang maupuah, taranak bakambang biak, pukek manganai anak kabau. Bumi sanang bareh manjadi.  Rakyat santoso. Anak sikola bariang riang. Ilia mudiak panduduak nagari tasanyum.

Sudah Mak Asan, duduak Mak Kulih sabanta. Tibo pulo urang ateh dikirim mauruih ranah sabanta pulo, sampai Ajo Inal tapiliah.

Maso Ajo Inal dibuek sambilan karajo gadang. Tamasuak di dalamnyo kelok sapuluah kurang ciek, labuah kapa tabang, mampagadang palabuhan kapa aia. Tamasuak mambukak rueh jalan baru sarato maaliakan anak aia ka tangah parak jadi sawah.

Sasudah tu, Mak Uniang ndak maikuik pakambangan bana lai. Antah apo dibuek urang, antalah. Tasarahlah. Nan paralu nagari ko lai tanang aman aman sajo. Suko ati awak lah.

Kutiko curito ko disampaian Mak Uniang ka Malanca sudah sumbayang subuah pagi tadi, Malanca mananyo, tantang duo urang amak amak nan basumangek ka mangganti Mak Inggih.

"Ba a manuruik Mak Uniang tu, kok tibo pulo inyo ka kampuang kito, manyaru ganti Mak Inggih?"

"Kampuang kito sagalo kurang, Nca. Awak paralu pandai pandai jo urang ateh. Beko sato lo awak bapihak, tapiliah  urang sabalah, kacau awak, Nca!"

"Jadi ba a ancak nyo, Mak?"

"Suko ati sae lah urang tu. Kito pacik pasan Mak Aneh sajolah: tahu diri."

"Kalau ba itu, ndak pandirian awak tu, Mak?"

"Kito musti tagak di nan bana, Nca. Kito hormati aturan."

Malanca tahanok. Apo koh mukasuik Mak Uniang, kecek Malanca dalam hati....

(*)