Notification

×

Iklan

Iklan

Mangeleh Angin

26 Januari 2019 | 13.07 WIB Last Updated 2019-01-26T06:07:29Z

Ditulis Oleh : A.S Patimarajo




Dulu ado kisah curito di rumah gadang balerong. Takalo Sutan Rajo Angek ka Batawi sudah Malari. Iko paratamu kali baliau naiak taksi. Tacangang mancaliak gaduang gaduang tenggih. Mangecek ngecek inyo surang diri. Sambia mamandang urang rami.

Supir taksi batanyo kutiko suaro Rajo Angek lah hanok, "Bapak dari Padang ya?"

"Dari Agam, sirah bandera kami!"

"Agam tu kan Padang juga, Pak?"

"Indak. Agam ya Agam. Padang ya Padang. Tahuulah sayaa!!!" suaro Rajo maninggi.

"Sudah sampai, Pak. Itu rumahnya yang cat kuning," kecek tukang taksi.

Tibo di muko rumah, Rajo Angek turun. Diagiahnyo putih saribu.  Dimintaknyo pulo baliak putih sambilan ratuih limo puluah ka supir.

"Ini uang kamu. Sosoh kumbali sambilan setengah ya," kecek Rajo Angek padek.

"Kurang salapan ratus lagi, Pak," jawek tukang taksi jo suaro lunak.

"Apa kata kamu? Satahu saya ongkos di sini sasukunyoh!" 

"Itu dengan bis, Pak. Ini Bapak dengan teksi. Mana bisa gocap. Ini kan pakai argo, Pak," kecek supir taksi tu manjalehan.

"Sama saja itu! Taksi ini kan oto juga!!" jawek Rajo Angek mangareh.

Sadang basitengkang di halaman, si Sapa kamanakan Rajo Angek kalua mancaliak mamaknyo nan lah tibo di muko rumah. 

"Ini bang, ongkos paman saya. Maklum maaf ya, beliau baru saja dari kampung," kecek Sapa sambia maagiah duoribu rupiah. "Ambil saja kembaliannya," tambah si Sapa.

"Mana sosohnya duaratus lagi. Nan kalamak dek kamu saja. Uang duaratus itu sahari kasawahnya itu di kampung," turo Rajo Angek sambia masuak rumah.

Sapaningga supir taksi, Sapa takekeh kekeh mandanga kecek Rajo Angek. Sangko gaek ko, oto manambang tu samo sajo. Kalua tarminal Pulogaduang, nyo bae mambek taksi mintak anta ka Kabun Kacang dakek Tanah Abang.

"Waden pulo ka dialuanyo. Mintak saribu lapan ratuih. Itu mangkonyo tabik burangsang waden," kecek Rajo Angek.

"Ha ha ha. Limopuluah rupiah tu, Amak naiak metro mini tu, Mak. Kalau taksi pakai argo, karateh putiah. Ado bayianyo tatulih di sinan," baleh Sapa. 

"Satahu waden jauh dakek di Jakata ko, gocap nyo, ha ha ha," sambia galak takekeh samo samo.

Lain Bangkaulu lain pulo Bangkauni. Lain maso dulu, lain pulo maso kini. Kapatang sudah sumbayang mugarik, Mak Uniang jo Malanca, tabayia ongkos oto grab hanyo duoribu  dari  Pasa Baru ka Borobudur.

Di tahun tujuahpuluhan pitih duo ribu tu badagok, bisa bali cincin sangah ameh. Makonyo Rajo Angek barek mambayia sabanyak itu. Kini kepeang duo ribu hanyo pacahan pitih ketek, untuak bali gulo gulo.

Batanyolah Mak Uniang ka Malanca, "Ba a pulo bisa tu, Nca. Ndak rugi inyo tu? Duo ribu babayia jo gopay," tanyo Mak Uniang.

"Rugi indak. Sabab inyo beko dapek pitih dari induak samangnyo duobaleh ribu. Jadi masuak ka rekening supir tu, ampek baleh ribu, Mak,"  jawek Malanca.

"Jadi, dari maa datang labo induak samangnyo nyo tu, Nca?"

"Inyo kan dapek data data panumpang. Itu nan dipagalehannyo, Mak," baleh Malanca sambia masuak lif hotel.

"Data ko kan samo jo angin mah. Sia pulo nan ka mambali," celoteh Mak Uniang.

"Lun tamakan dek awak lai, Mak. Tambahlah sikola awak lu. Baru wak bisa maiiriangan urang tu. Kalau angin sae lah dibalinyo, santa lai nagari awak bisa dijuwa urang tu, Mak," jawek Malanca mambandiang.

Giliran Mak Uniang ta haniang....
×
Kaba Nan Baru Update