Tajadi di lapau simpang sanjo bagewai, maso bagolak. Panuah kadai basasak mandanga siarak duo balah puak. Sabalah kalua tagak ka Sadin, sabalah ka dalam bapacik ka Inyiak.
Sadin anak mudo gagah. Pinggang gantiang, kapalo tagak, rono muko co bulan ampek baleh. Ibarat balabuah luruih parumahan data. Barabuik urang nak basalam. Kok tak dapek mancaliak bakodak jauah jadi juwo.
Sato jadi panungkek Datuak Kayo jadi Kapalo Kampuang maso itu, dek Sadin hanyo kaganti ama ibadah. Indak ditaka mancari labo, hanyo sakadar manoloang anak kamanakan. Ameh babungkah dalam biliak, diasahnyo kajadi ongkos ilia mudiak.
Samantaro Inyiak Labai, ibarat karambia lah tamasuak kalapo tuwo. Urang baumua manunggu sanjo. Badan goncoa langkah lah barek. Tagak lamo bapetai petai. Tapi salero alun mamantang. Sumangek tabudua nak bakuaso. Baliau tasanyun masuak galanggang.
Anak nagari jarang mandakek ka Inyiak takalo di ateh pamatang. Raso sio sio utang tumbuah. Antah beko sadang jo awak, marawok baliau ka jarami. Alamat kalam kuluala.
Baraliah kaba ka Mak Inggih konco sapakek Inyiak Labai. Baliau galik bamain aka. Dek baliau tak ado nan sulik. Tang kato alu, kutantang kato dadak. Sampik bakeh lalu, baliau aliah tampek tagak.
Hari harinyo kadok baandai bakucindan. Bajanji tiok sabanta. Acok mukia pado tapek. Jikok disasak jawek lansai jo galak manih.
Pihak kapado Datuak Kayo kawan main Sadin Pono, lain pulo kamehnyo. Badan gampa kapalo tagak, ikua tagerai manyalasai. Baliau jikok mangecek bajaleh jaleh. Banyak manguaso caro asiang. Nampak tagehnyo basoal jawek.
Satantang iko pulo tiok lapau di nagari angek maso itu. "Lah takah pucuak jo urek salisiah barang ko, kok ado juwo nan manyabuik Inyiak tagak tali. Yo lah maleset mah," kecek puak Sudin di bangku panjang.
"Iko indak maleset. Inyiak tu lah suai jadi panungkek. Mauruih kampuang ko, yo jo caro Inggih nan tapek," jawek urang di meja muko nan bapihak ka Inyiak Labai.
Kutiko kaba ko ditanyoan Malanca ka Mak Uniang, sudah sumbayang subuah di musajik pagi tadi, Mak Uniang maangguak ketek.
"Ba a dek saketek sajo angguak Mamak satantang iko?" tanyo Malanca.
"Maso itu, pasaran yo agek angek mah. Ado bado'a baulang bagai, karano ndak suai jo pamintaan," jawek Mak Uniang manganang.
Malanca tamanuang. Apo garan do'a nan baulang tu.......
.jpeg)
