Ditulis Oleh : A.S Patimarajo
Sudah sumbayang subuah di musajik pagi tadi, Mak Uniang bakisah ka Malanca satantang carito nan bakambang maso bagolak dulu.
Suatu kali, hari nan sadang tangah hari. Sadang babunta bayang bayang. Sadang balinduang salaguri. Sadang rami urang di pasa. Sadang langang urang di kampuang, Amak tu tibo maanta pasan ka lapau kopi tangah balai.
Kecek Amak ko, bisuak kito buek lubang ameh. Kito pabanyak batanam padi. Sabab dek ameh kameh, dek padi manjadi. Ilang rono dek panyakik, ilang tuah tak barameh. Hiduik musti bapanyimpan. Barasan musti panuah tiok hari.
Manuruik Amak tu pulo, jalan mutuih tiok dusun musti dibuek. Supayo dakek urang jalan ka parak. Buah jaguang bakulak kulak, karambia batombak tombak, langsuang masuak garobak. Ditundo ka pasa capek jadi pitih.
Anak sikola diaja batanam pisang di ladang. Babuah satandan gadang, dibuek katan goreang. Dijuwa ka pasa, langsuang dapek kepeang. Ka baliak dibali pulo anak ikan, dilapeh dalam banda larangan supayo lakeh gadang. Bisa pulo mambangun kampuang.
Isuak ko, aia lawik dihampang gadang. Pabiya sampai kariang jadi garam. Garam dicetak sagadang balok es. Dibaok jo padati manuju darek. Dijuwa murah ka urang kadai, supayo lamak pulo makan urang di lapau simpang.
Ciek layi kato Amak tu, bisuak ko, tiok rumah diagiah jawih sarato kabau. Diagiah ayam jo itiak. Diaja bataranak ikan tabek. Supayo ado kaceyo untuak naiak haji ka Makah. Supayo dapek pulo ka Madinah. Kok paralu singgah ka Turki jo Mesir mancaliak jajak nabi nabi.
Pokoknyo bisuak ko, kecek Amak tu, kito buek padi masak, jaguang maupiah, taranak bakambang biak. Nagari aman umaik santoso. Sahinggo mamuji ruah niniak muyang dalam kubua, mancaliak anak cucunyo tanang baibadah.
Sudah batutua bayobana, takah mandanga dendang main kim, Amak tu tagak mambayia minun ka urang kadai. Manjalang kalua, ado surang pandanga di lapau tu batanyo, "Tanyo ciek Sutan. Sutan ko nan mangecek sabanta ko, dari maa ko?"
"Ambo dari tim mah Ungku," jawek Amak tu.
"Tim nan bajanji dulu juwo, Sutan?"
"Iyo, Ngku."
"Kok urang itu juwo nan Sutan galehan, ka nan lain sajolah juwa ubek ko yo. Kami ndak picayo ka inyo lai doh," kecek urang di kadai.
Sudah tu, Amak ko payi sajo lai...
.jpeg)
