Notification

×

Iklan

Iklan

Mak Adang Pulang

02 Juni 2019 | 12:20 WIB Last Updated 2019-06-02T05:20:36Z
Ditulis oleh: AS Patimarajo

Pasbana.com-- Kapatabang  maha. Kapa lawik sandek. Tiket oto manambang lah naik pulo. Akianyo Mak Adang jo urang rumah  sarumpun jo anak anak pulang jo oto pribadi.

Kalau jo oto surang, lain pulo seronyo. Dimaa takana bisa singgah. Dima nan rancak bisa manapi. Bisa mandi sarato tuka baju sasuko hati.

Baganti ganti jo mandan satujuan jadi supir, Mak Adang manakan gas sudah sumbayang subuah hari Kamih dari Citayam. Malaju manuju Merak. Manyubarang ka Bangkahuni.

Sanang bana hati Mak Adang, ba itu tibo di Pulau Andalas. Ikolah pulao nan baliau cintoi dari lubuak hati nan dalam.  Pulau tampek baliau baraja mangaji di surau di Nagari Rao Rao, Tanahdata, Luhak Nan Tuo.

Pulau tampek baliau sikola tingkek manangah di Kota Duri, Riau. Pulau tampek ayah jo ibu bausaho di rantau urang. Pulau tampek  baliau kuliah di IKIP Padang. Pulau bajuta kenangan dek Mak Adang.

Sarueh kanangan itu pulo, tacatat dalam buku harian,  maso kuliah di Padang, Mak Adang sobok jo Mak Uniang nan maso itu kuliah di Unand.

Antaro Mak Adang jo Mak Uniang lah bak santan jo tangguli. Bak aua jo tabiang. Samo samo baraja manyari tambah balanjo jo caro manulih di surek kaba.

Kutiko lah tamat kuliah,  samo marantau pulo ka Jakarta. Mak Adang batahan di Batawi  jadi wartawan istana. Mak Uniang baliak kanan, pulang kandang ka rumah bagonjoang, Sudirman 51.

Papisahan mamiliah jalur kahidupan ko, balangsuang di tahun 1996. Hampia  saparampek abad nan lampau. Tapi kini barakek bantuan teknologi, tiok sabanta Mak Adang jo Mak Uniang kontak kontak malalui hape.

"Ambo lah tibo di Lahat," kecek Mak Adang mambari tahu Mak Uniang, Jumat pagi malalui talepon. "Inshaa Allah kalau lancar barisuak pagi sampai di Payokumbuah."

Hari Satu manjalang subuah, Mak Adang lah tibo di Payokumbuah. Hanyo 43 jam dalam pajalanan. Lari oto bakisa 80 jo 100. Untuang baliau dapek kawan supir medan.

Mak Adang manyumando ka Payokumbuah. Tampek baliau KKN. Mak Uniang baurang rumah, ka rang sakampuang di Limo Kaum, Batusangka, sasuai pintak urang tuwo.

"Sanayan pagi, ambo ka Duri mancaliak urang gaek, supayo bisa buko basamo jo ayah ibu," kecek Mak Adang manelepon dari Payokumbuah.

Mandanga suaro Mak Adang manyabuik ayah ibu, Mak Uniang tahanok. Tabayang maso ketek ketek dulu Mak Uniang buko basamo jo ayah ibu. Kutiko maningkek remaja Mak Uniang lah yatim. Basamo ibu sampai Mak Uniang barumah tanggo. Sasudah itu, ibu pun bapulang.

"Baruntuanglah Mak Adang masih punyo ayah jo ibu. Caliaklah rang gaek tu dulu. Kalau lah baliak dari Duri, sobok wak di Padang Panjang," baleh Mak Uniang jo suaro sakek. Mak Adang paham.

Manjalani kahidupan di kota gadang, Mak Adang mambuek hituang hituang masak masak.  Maningkek umua 40 baliau baraliiah tagak jadi dosen sasudah tamat S2 UI. Kini masuak mandakek 50 baliau hampia pulo tamat  S3 di UNJ. Samantaro manulih mambuek buku tatap baliau jalani.

"Kok ka batahan di galanggang, sikola musti ditambah. Kalau ndak ba itu, taicia awak dek urang lain," kato Mak Adang dulu suatu kali.

Apo nan disampaian Mak Adang tu, suai bana jo nasihat dari urang tuwo tuwo maso saisuak. Pituah ko baliau amakan manjalani sacaro takun, manampuah lekok  liku jalan pajuangan.

Itulah sakalumik kisah Mak Adang dari nagari kiramat. "Banyak nan paralu ditiru dari Mak Adang dek nan mudo mudo kini," kecek Mak Uniang ka Malanca sambia jalan pulang sudah sumbayang subuah di musajik pagi tadi.

"Aponyo ka ditiru, Mak?" tanyo Malanca.

"Inyo tu gigiah manuntuik ilemu. Santun pulo ka urang gaek. Sasampik sampik wukatu di rantau urang. Sakali satahun, inyo usahokan juwo mancaliak ayah ibunyo pulang," jaleh Mak Uniang.

Malanca tamanuang. Sabab inyo cuma marantau sabaliak dindiang, jarang pulo sobok jo urang gaek. 

"Tapi ambo lai acok kontak jo hape jo ayah jo ibu, Mak. Pitih layi pulo ambo kiriman sakali sakali. Kan layi santun pulo ambo tu," solang Malanca.

"Dek ayah jo ibu tu, basalam jo inyo tu nan banilai tinggih, Nca. Apo layi awak manakua mancium tangannyo. Itu labiah baharago dari saganggam ameh," baleh Mak Uniang.

Malanca ta haniang, aia matonyo taganiang.....

(Salamat hari rayo idul fitri dunsanak. Mohon maaf lahia batin. Salam arek dari Mak Uniang).