Oleh: AS Patimarajo
Pasbana - Main Inun dipiliah arwah jadi tapatan. Kutiko dipanggia arwah urang nan lah maningga, arwah itu tibo, bisa mangecek ngecek jo urang nan mandanga, mamakai badan Mak Inun.
Ado dulu, Mak Inun maubek urang sakik. Sabananyo nan maubek tu, arwah saurang tabib nan lah maingga. Arwah tu bisa maubek urang sakik, jo caro mamakai badan Mak Inun, maracik ubek.
Sapinteh lalu, urang mancaliak Mak Inun nan maubek urang sakik. Padohal nan maubek adolah saurang tabib, nan lah maningga mati sahid. Arwahnyo bisa datang mamakai badan Mak Inun, kutiko dipanggia.
Suatu kali Ungku Malin duduak jo Mak Inun di barando rumahnyo, patang hari sudah sumbayang asa. Pado maso itu, Mak Uniang masih kanak kanak sakola dasar, maso orde baru.
Mak Inun mangecek ka Ungku Malin, baso arwah ado ka turun. Mak Inun mintak izin lalok basalimuk kain panjang.
Di baliak kain panjang tadi, tadanga bunyi urang maucap salam. Sudah itu urang ko duduak mamakai badan Mak Inun. Ungku Malin batanyo siapo ko tuan nan tibo?
Urang tu manyabuik namonyo, jo namo sabuah negara di Timur Tengah tampek inyo barasa. Disabuiknyo pulo dulu samaso hiduik karajonyo tantara, kamudian mati sahid.
Lah mangecek sakian lamo jo Ungku Malin, arwah tu mintak parmisi. Inyo lalok baliak di bawah kain salimuik. Sudah tu Mak Inun jago. Mak Inun kumbali takah biaso.
Mak Inun ndak mangatahui buah tutua arwah tadi jo Ungku Malin, nan balansuang labiah kurang satangah jam.
Pado lain hari, Mak Inun tibo ka rumah Ungku Malin sudah sumbayang isya. Sarupo takah sabalumnyo, arwah turun. Mak Inun basalimuik kain panjang. Di baliak salimuik tadanga ucapan salam.
Ruponyo nan tibo, arwah urang siak. Pangajiannyo tinggi samo jo kaji Ungku Malin. Lamo baliau mangecek jo Ungku Malin pakaro jalan nan ditampuah, kutiko sakaratul maut tibo.
Mak Uniang maso itu hanyo manyimak nyimak sajo. Alun mangarati apo buah pabincangan urang tu. Lah kudian, sajak mambaco baco kitab paninggalan Ungku Malin, baru Mak Uniang paham buah tutua arwah urang siak jo Ungku Malin maso dulu itu.
Sapangatahuan Mak Uniang, sabyak itu arwah nan turun, malalui badan Mak Inun, indak ado saurang juwo nan mamburuak buruak kan urang lain. Ndak ado pulo nan maolok olok urang lain.
Buah tutuanyo, banyak nasihat nasihat sajo, satantang dunia samantaro akhirat salamonyo. Satantang Allah kuaso, mukhaluak indak kuaso.
Ndak ado arwah tu manyabuik, Fir'un, Haman, Korun. Ndak ado arwah nan turun tu, mangato tantang kakuasaan. Mungkin ndak bidang arwah itu pulo, untuak manyabuik tantang itu.
Suatu kali kutuko Mak Uniang sikola sempe, dibaok Mak Inun ka suatu tampek, pandan pakuburan urang karamat, di kampuang kami. Maso itu, di kuburan urang karamat tu, Mak Inun nampak mambiak pitih dalan peti.
Mak Uniang mancaliak sajo dari jauah. Ruponyo arwah nan turun ka badan Mak Inun, itu nan mambukak peti, nan mambiak pitih di tampek panyimpanannyo.
Kudiannyo, kutiko Mak Uniang tanyo ka Mak Inun, tantang pitih, ameh nan disimpan di kuburan urang karamat tadi, Mak Inun ndak bisa manjawabnyo.
Sabab Mak Inun ndak tahu apo nan tajadi. Ameh jo pitih tu bukan punyo Mak Inun. Mak Inun ndak bisa manguasoi. Mak Inun hanyo manarimo kalau tibo tibo, saku bajunyo barisi pitih. Itu pun sakadarnyo sajo.
Kini Mak Uniang paralu pitih mambangun pesantren. Sayang arwah nan punyo pitih jo ameh di kuburan urang karamat dulu tu, ndak bisa dipinggia turun. Sabab, tapatannyo ndak ado lai. Karano Mak Inun lah maningga.
Tapi Mak Uniang yakin, Allah kuaso, mukhaluak ndak kuaso. Kalau Allah Ta'ala bakahandak, tungkek kayu Nabi Musa bisa manjadi ula.
Apo lai urusan pambangunan nan tabangkalai, hanyo urusan remeh temeh bagi Allah Ta'ala.
Carito ko disampaian Mak Uniang ka Malanca, pulang musajik sudah sumbayang subuah pagi tadi. Malanca manyolo, "Mak Uniang carito Mak Inun ka ambo, atau curhat tantang pasantren ka ambo ko?"
"Kaduo duonyo, Nca," baleh Mak Uniang.
"Agiah lah ambo proposal ciek. Beko ambo agiahan pulo ka Caleg," kecek Malanca takah yo bana.
Giliran Mak Uniang nan tapana dek Malanca...
.jpeg)
